Raglavar ha Salusyans

1Diskwedhyans Yesu Krist, a ros Duw dhodho rag diskwedhes dh'y wesyon an taklow a goedh hwarvos yn skon; ow tannvon derivadow der y el dh'y was Yowann, 2a dheg dustuni a ger Duw hag a dhustuni Yesu Krist – pup-tra a welas.

3Gwynnvys neb a red, ha'n re a glew geryow an profoesans ha gwitha an taklow skrifys ynno: rag an termyn yw ogas.

4Yowann dhe'n seyth eglos yn Asia:

Gras dhywgh hwi ha kres dhiworth neb yw, hag o, hag a dheu ha dhiworth an seyth spyrys usi a-dherag y dron, 5ha dhiworth Yesu Krist, an test len, an kynsa dineythys a'n re varow, ha rewler myghternedh an norvys.

Dhe neb a'gan kar ha'gan delivras mes a'gan peghosow der y woes, 6ha'gan gul gwlaskor, oferysi dhe Dhuw y Das; dhodho ev re bo gordhyans ha galloes trank heb worfenn. Amen.

7Awotta, ev a dheu gans an kommol;

ha pub lagas a wra y weles,

ha'n re ynwedh a'n gwanas;

hag oll kenedhlow an norvys a wra kyni warnodho.

Ya, Amen.

8‘My yw an Alfa ha'n Omega’, yn-medh an Arloedh Duw, neb yw, ha neb o, ha neb a dheu, an Ollgalloesek.

Gwelesigeth a Grist

9My Yowann, agas broder, ha'gas kevrenner yn anken hag y'n wlaskor, hag yn perthyans yn Yesu, esa y'n ynys gelwys Patmos, rag ger Duw ha dustuni Yesu. 10Yth esen y'n Spyrys yn dydh an Arloedh, ha klewes a-dryv dhymm lev bras, kepar ha hirgorn, 11ow leverel, ‘An pyth a welydh skrif yn rol-skrifa, ha dannvon dhe'n seyth eglos, dhe Efesus, ha dhe Smyrna, ha dhe Pergamum, ha dhe Thyatira ha dhe Sardis, ha dhe Filadelfia, ha dhe Laodikea.’

12Ha my a dreylyas dhe weles an lev esa ow kewsel genev ha wosa treylya, my a welas seyth kantoler owrek, 13hag yn mysk an kantolbrennyer onan kepar ha Mab den, gwiskys yn pows ow trehedhes bys y'n treys, ha grogysys a-dro dhe'n dhiwvronn gans grogys owrek. 14Y benn ha'y vlew o gwynn avel gwlan gwynn, gwynn avel an ergh, ha'y dhewlagas kepar ha tan ow flammya; 15ha'y dreys o kepar ha brest fin purhes kepar hag yn fornes, ha'y lev kepar ha son lies dowr. 16Ha ganso yn y dhorn dhyghow yth esa seyth sterenn, ha kledha lymm dewvinyek ow tos yn-mes a'y anow, ha'y fas kepar ha'n howl ow splanna yn y nerth.

17Ha pan y'n gwelis, my a goedhas orth y dreys kepar ha pan ven marow. Hag ev a worras y dhorn dhyghow warnav, ow leverel, ‘Na borth own. My yw an kynsa ha'n diwettha, 18ha neb a vew; hag yth eth ha bos marow; hag otta, bew ov vy trank heb worfenn, hag y'm beus alhwedhow ankow hag ifarn. 19Ytho skrif an pyth a welsys, ha'n pyth yw, ha'n pyth a hwyrvydh wosa an taklow ma. 20Mysteri an seyth sterenn a welsys a dhyghow dhymm, ha'n seyth kantoler owrek: an seyth sterenn yw eledh an seyth eglos: ha'n seyth kantoler yw an seyth eglos.