An Dhew Dest

1Hag y feu res dhymm korsenn kepar ha gwelenn, ow leverel, ‘Sav yn-bann ha musur tempel Duw, ha'n alter, ha'n re a wordh ynno. 2Mes gwra goheles an klos usi a-ves dhe'n tempel, ha na wra y vusura rag y vos res dhe'n Jentilys; hag i a wra trettya an sita sans dew vis ha dew-ugens. 3Ha my a rov galloes dhe'm dew dest hag i a wra profoesa mil dhydh dew kans ha tri-ugens, ow kwiska yskar.’

4An re ma yw an dhew olewbrenn ha'n dhew gantolbrenn ow sevel a-dherag Arloedh an nor. 5Ha mar mynn nebonan aga fystiga, tan a dheu yn-mes a'ga ganow ha diswul aga eskerens, ha den mar mynn aga fystiga, res yw dhodho bos ledhys yndellma. 6Gans an re ma, yma galloes dhe dhegea an ebron, ma na goettho glaw yn dydhyow aga frofoesans, hag yma gansa galloes war dhowrow dh'aga threylya dhe woes, ha gweskel an dor gans pub pla mar venowgh dell vynnons.

7Ha pan worfennons aga dustuni, an best a yskynn a'n pytt diwoeles a wra gwerrya er aga fynn ha'ga fetha ha'ga ladha. 8Ha'ga horfow a wra growedha yn plen an sita vras yw gelwys yn spyrysel Sodom hag Ejyp, may feu aga Arloedh krowsys ynwedh. 9Ha'n re a'n poblow ha'n loethow, ha'n tavosow, ha'n kenedhlow a wra gweles aga horfow tri dydh ha hanter, ha ny wrons gasa aga horfow dhe vos gorrys yn bedh. 10Ha'n re a drig war an nor a wra lowenhe warnedha, ha heudhhe, ha dannvon rohow an eyl dh'y gila, rag an dhew brofoes ma a dormentyas an re usi trigys war an nor.

11Ha wosa tri dydh ha hanter, spyrys bewnans a Dhuw eth a-bervedh ynna hag i a sevis war aga threys hag own bras a goedhas war an re a's gwelas. 12Hag i a glewas lev bras dhiworth nev ow leverel dhedha, ‘Dewgh yn-bann omma.’ Hag i a yskynnas dhe nev yn kommolenn; ha'ga eskerens a's gwelas. 13Hag y'n keth eur y feu dorgrys bras ha'n degves rann a'n sita a goedhas, hag y'n dorgrys seyth mil dhen a veu ledhys, ha'n re erell a veu dyegrys ha ri gordhyans dhe Dhuw nev a wrussons i.

14Ha'n nessa guw yw tremenys; otta, an tressa guw a dheu yn skon.

An Seythves Hirgorn

15Ha'n seythves el a hwythas an hirgorn, hag yth esa levow bras yn nev ow leverel,

‘Gwlaskor an bys ma res eth ha bos gwlaskor agan Arloedh

ha'y Grist,

hag ev a reyn trank heb worfenn.’

16Ha'n peswar henavek warn ugens o esedhys war aga thronys, a goedhas war aga fas ha gordhya Duw, 17ow leverel,

‘Ni a ras dhis, A Arloedh Duw Ollgalloesek,

neb os ha neb es,

rag ty a gemmeras dha alloes bras ha reynya.

18Ha'n kenedhlow o serrys,

ha'th sorr yw devedhys,

ha'n termyn dhe vreusi an re varow,

ha dhe ri gober dhe'th wesyon an brofoesi

ha dhe'n syns ha dhe'n re a berth own a'th hanow,

dhe'n re vyghan ha'n re veur

ha dhe dhiswul an re a dhiswra an dor.’

19Ha tempel Duw yn nev a veu igerys hag argh y gevambos a veu gwelys yn y dempel hag y feu lughesennow ha sonyow ha taranow ha dorgrys, ha keser meur.