An Venyn ha'n Dhragon

1Ha tokyn bras a veu gwelys yn nev; benyn gwiskys gans an howl, ha'n loer yn-dann hy threys, ha kurun a dhewdhek sterenn war hy fenn; 2ha hi gans flogh y'n dorr, a armas yn gloesow, ow lavurya dhe dhineythi. 3Ha ken tokyn a veu gwelys yn nev, hag otta, dragon rudh meur gans seyth penn ha deg korn ha seyth diadem war hy fennow. 4Ha'y lost a skubas an tressa rann a'n ster a nev ha'ga thewlel dhe'n dor ha'n dhragon a sevis a-dherag an venyn a vedha ow tineythi, may teppra hy flogh kettell wrella hi y dhineythi. 5Ha hi a dhineythis mab gorreydh a vedha ow pugelya pub kenedhel gans gwelenn horn: ha'y flogh a veu ravshys dhe Dhuw, ha dh'y dron. 6Ha'n venyn a fias dhe'n gwylvos, le may ma dhedhi tyller parys gans Duw, ma's makkens hi ena mil dhydh dew kans ha tri-ugens.

7Hag yth esa kas yn nev. Mighal ha'y eledh a omladhas erbynn an dhragon; ha'n dhragon a omladhas ha'y eledh hi, 8ha ny fethsons i; ha ny veu aga thyller kevys namoy yn nev. 9Ha'n dhragon veur a veu tewlys yn-nans, an sarf goth neb yw gelwys an Jowl, ha Satnas, neb a doell oll an bys: ev a veu tewlys yn-nans bys y'n dor, ha'y eledh a veu tewlys yn-nans ganso.

10Ha my a glewas lev ughel yn nev ow leverel,

‘Lemmyn selwyans, ha nerth,

ha gwlaskor agan Duw yw devedhys,

ha galloes y Grist:

rag bos kuhudhor agan breder tewlys yn-nans,

neb a's kuhudhas dydh ha nos a-dherag agan Duw.

11Hag i a'n fethas dre woes an Oen

ha dre er aga dustuni,

ha ny garsons aga bewnans bys yn ankow.

12Ytho, lowenhewgh, a nevow,

ha hwi a drig ynna.

Tru dhe'n dor ha dhe'n mor,

rag an Jowl re dhiyskynnas dhywgh hwi,

ha sorr bras ganso,

rag ev a woer bos termyn berr ganso ev.’

13Ha pan welas an dhragon hy bos tewlys bys y'n dor, hi a helghyas an venyn a dhineythis an flogh gorreydh. 14Ha dhe'n venyn y feu res diwaskell an er bras may halla nija a-bervedh y'n gwylvos, bys yn hy thyller mayth yw megys ena termyn ha termynyow ha hanter termyn, dhiworth fas an sarf. 15Ha'n sarf a dewlis dowr yn-mes a'y anow kepar hag avon war-lergh an venyn may hwrella dhedhi bos degys dhe-ves gans an avon. 16Ha'n dor a weresas an venyn ha'n dor a igoras y anow ha lenki an avon a dewlis an dhragon yn-mes a'y ganow. 17Ha'n dhragon a sorras orth an venyn, hag yth eth dhe werrya gans remenant hy has neb a with gorhemmynnow Duw, ha dustuni Yesu yma gansa i. 18Ha hi12:18 hi: War-lergh re a'n dornskrifow, my a sevis war dreth an mor.12:18 Yn re a dhyllansow an tekst greka yma an geryow ma gorrys yn dhalleth 13:1.