An Dhew Vest

1Ha my a welas best ow trehevel yn-mes a'n mor, ha ganso deg korn ha seyth penn ha deg diadem war y gern, ha hanow blasfemi war y bennow. 2Ha'n best a welis o kepar ha lewpard, ha'y bawyow kepar ha pawyow ors, ha'y vin kepar ha min lew, ha'n dhragon a ros dhodho hy nerth, ha'y thron, ha galloes meur. 3Ha my a welas onan a'y bennow kepar ha pan ve goliys bys yn ankow, ha sawys veu y woli marwel, hag y feu marth gans oll an bys ow siwya war-lergh an best. 4Hag i a wordhyas an dhragon rag hi dhe ri galloes dhe'n best: hag i a wordhyas an best, ow leverel, ‘Piw yw kepar ha'n best, ha piw a yll gwerrya ganso?’

5Ha ganow a veu res dhodho, ow leverel taklow meur ha blasfemiow; ha galloes a veu res dhodho dhe weytha dew vis ha dew-ugens. 6Hag ev a igoras y anow yn blasfemiow erbynn Duw dhe vlasfemya y hanow ha'y dabernakel, ha'n re a drig yn nev. 7Hag y feu res dhodho dhe werrya gans an syns, ha'ga fetha: ha galloes a veu res dhodho war bub loeth ha pobel ha taves ha kenedhel. 8Hag oll trigoryon an norvys a wra y wordhya, nag yw skrifys aga henwyn yn lyver bewnans an Oen a veu ledhys, a-ban veu an norvys dallethys.

9Den mara'n jeves skovarn, klewes ev.

10Neb a ello yn kethneth,

yn kethneth yth a:

neb a vo ledhys gans kledha,

gans kledha y fydh ledhys.

Ottomma perthyans ha fydh an syns.

11Ha my a welas ken best owth yskynna yn-mes a'n dor; hag yth esa dhodho dew gorn kepar hag oen, hag yth esa ow kewsel kepar ha dragon. 12Hag ev a ober gans oll an galloes a'n kynsa best a-dheragdho, hag ev a wra dhe'n dor ha dhe'n re a drig ynno gordhya an kynsa best hag a veu sawys y woli marwel. 13Hag ev a wra toknys bras may hwra dhe dan diyskynna dhiworth nev dhe'n dor a-dherag tus. 14Hag ev a doell an drigoryon war an bys der an toknys a veu res dhodho dhe wul a-dherag an best; ow leverel dhe'n re a drig war an bys may hwrellens imaj dhe'n best a veu goliys der an kledha hag a vewa. 15Hag y feu grontys dhodho dhe ri bewnans dhe imaj an best may kowssa imaj an best, ha may hwrella, kemmys na vynnens gordhya imaj an best dhe vos ledhys. 16Hag ev a wra dhe bub den, byghan ha bras, ha rych ha boghosek, ha rydh ha keth, degemmeres merk war an dhorn dhyghow, po war an tal, 17ha ma na alla denvyth na prena na gwertha, marnas neb a'n jevo an merk, hanow an best, po niver y hanow. 18Ottomma skentoleth. Neb a'n jevo skians niveres ev niver an best, drefenn y vos niver den; ha'y niver yw hwegh kans hwegh ha tri-ugens.