Fiolyow Sorr Duw

1Ha my a glewas lev ughel yn-mes a'n tempel ow leverel dhe'n seyth el, ‘Kewgh dhe skoellya an fiolyow a'n sorr a Dhuw war an dor.’

2Ha'n kynsa eth dhe skoellya y fiol war an dor; ha podredhes drog ha tynn a dheuth war an dus gans merk an best, ha war neb a wordhya y imaj.

3Ha'n nessa a skoellyas y fiol war an mor; hag yth eth kepar ha goes den marow ha pup-tra bew usi y'n mor a verwis.

4Ha'n tressa a skoellyas y fiol war an avonyow ha fentynyow an dowrow, ha goes ethons i ha bos. 5Ha my a glewas el an dowrow ow leverel, ‘Gwiryon osta jy, ty sans, neb yw, ha neb o, rag ty dhe vreusi an taklow ma. 6Rag i a skoellyas goes an syns ha'n brofoesi, ha ty re ros dhedha goes dhe eva. Gwiw yns i a henna!’ 7Ha my a glewas an alter ow leverel, ‘Dhe wir, A Arloedh Duw Ollgalloesek, gwir hag ewn yw dha vreusow.’

8Ha'n peswora a skoellyas y fiol war an howl, hag y feu gesys dhodho leski tus gans tan. 9Ha tus a veu leskys dre doemmder bras, hag i a vlasfemyas hanow Duw neb a'n jeves galloes war an plaow ma, ha ny gemmersons edrek dhe ri gordhyans dhodho.

10Ha'n pympes a skoellyas y fiol war dron an best; ha'y wlaskor a veu tewlhes ha tus a gnias aga thaves dre bayn. 11Hag i a vlasfemyas Duw nev drefenn aga faynys ha'ga podredhes, ha ny gemmersons edrek a'ga gwriansow.

12Ha'n hweghves a skoellyas y fiol war an avon vras Ewfrates; ha'y dowr a veu syghys may halla bos pareusys fordh an vyghternedh dhiworth an howldrevel. 13Ha my a welas tri spyrys avlan kepar ha kwilkynyow ow tos yn-mes dhiworth ganow an dhragon, ha dhiworth ganow an best, ha dhiworth ganow an fals profoes. 14Rag yth yns i spyrysyon dywolow ow kul toknys hag a yn-rag dhe vyghternedh oll an bys rag aga huntell war-barth dhe gas an jydh bras na a Dhuw Ollgalloesek. 15(‘Otta, my a dheu kepar ha lader. Gwynnvys neb a woel ha gwitha y dhillas na gertho noeth, ha na wello tus y noethedh.’) 16Hag ev a's kuntellas war-barth dhe dyller henwys yn Ebrow, Armageddon.

17Ha'n seythves a skoellyas y fiol war an ayr, ha lev ughel a dheuth yn-mes a'n tempel dhiworth an tron ow leverel, ‘Gwrys yw!’ 18Hag yth esa lughesennow ha sonyow ha taranow hag yth esa dorgrys bras a sort na hwarva a-ban veu tus war an nor, mar vras veu an dorgrys. 19Ha'n sita vras a veu rynnys yn teyr rann, ha'n sitys a'n kenedhlow a goedhas: ha Babylon vras a veu kovhes a-dherag Duw, dhe ri dhedhi hanaf an gwin a gonnar y sorr. 20Ha pub ynys a fias, ha ny veu kevys an menydhyow. 21Ha keserennow mar vras avel kanspoes a goedhas a'n nev war dus, ha tus a vlasfemyas Duw drefenn pla an keser, rag bos y bla meur dres eghenn.