An Hora Veur ha'n Best

1Hag onan a'n seyth el gans an seyth fiol a dheuth dhe gewsel orthiv, ow leverel, ‘Deus, my a vynn diskwedhes dhis breus an hora veur yw esedhys war lies dowr, 2ha gensi myghternedh an norvys re wrug fornikasyon, ha trigoryon an nor re omvedhwis dre win hy fornikasyon.’ 3Hag ev a'm dug a-bervedh yn difeyth y'n spyrys, ha my a welas benyn esedhys war best rudh, leun a henwyn blasfemus, gans seyth penn ha deg korn. 4Ha'n venyn o gwiskys yn purpur ha pann kogh, ha kudhys gans owr ha men drudh ha perlys, gans hanaf owrek yn hy dorn, leun a'n taklow kasadow hag avlan a'y fornikasyon. 5Ha war hy thal o skrifys hanow, yw mysteri, ‘Babylon vras, mamm oll horys ha taklow kasadow an nor.’ 6Ha my a welas an venyn-medhow der woes an syns ha dre woes mertheryon Yesu.

Ha marth meur dres eghenn a veu genev pan y's gwelis. 7Hag yn-medh an el dhymm, ‘Prag y feu marth genes? My a vynn leverel dhis mysteri an venyn ha'n best a's deg, ha ganso an seyth penn ha'n deg korn. 8An best a welsys a veu, ha nyns yw; hag ev a vydh owth yskynna yn-mes a'n pytt diwoeles, ha mos a wra dhe dhiswrians. Hag y fydh marth dhe drigoryon an norvys, na veu skrifys aga hanow y'n lyver a vewnans dhiworth gwrians an bys, pan welons an best, rag yth o, ha nyns yw, hag y fydh.

9‘Ottomma styryans rag an re fur. An seyth penn yw seyth menydh le may ma an venyn esedhys. 10Seyth myghtern yns i keffrys: pymp a goedhas, onan yw, ha'n arall ny dheuth hwath, ha pan dheffo, y koedh dhodho gortos berr dermyn. 11Ha'n best hag a veu, ha nyns yw, ev ynwedh yw an ethves, hag yw avel onan a'n seyth; hag yth a dhe dhiswrians. 12Ha'n deg korn a welsys yw deg myghtern na dhegemmeras gwlaskor bys lemmyn mes i a dhegemmer galloes avel myghternedh rag unn our gans an best. 13An re ma a's teves unn brys hag i a re aga nerth ha'ga galloes dhe'n best. 14An re ma a wra gwerrya erbynn an Oen, ha'n Oen a wra aga thryghi: drefenn y vos Arloedh arlydhi, ha Myghtern myghternedh, ha'n re usi ganso yw gelwys, ha dewisys, ha len.’

15Hag yn-medh ev dhymm, ‘An dowrow a welsys le may ma an hora esedhys yw poblow ha routhow, ha kenedhlow ha tavosow. 16Ha'n deg korn a welsys ha'n best: an re ma a wra kasa an hora ha'y gul gwastys ha noeth hag a wra dybri hy hig ha'y leski gans tan. 17Rag Duw re worras yn aga holonn kollenwel bodh y vrys, ha bos unnverhes, ha ri aga gwlaskor dhe'n best erna vo kowlwrys geryow Duw. 18Ha'n venyn a welsys yw an sita vras, a's teves galloes war vyghternedh an norvys.’