1Wosa an taklow ma, my a glewas kepar ha pan ve lev bras lies den yn nev ow leverel,

‘Alleluya;

selwyans, ha gordhyans, ha galloes dh'agan Duw:

2rag gwir hag ewn yw y vreusow;

rag ev re vreusis an hora vras

a legris an nor gans hy fornikasyon,

hag ev re dhiallas goes y wesyon warnedhi.’

3Hag arta i a leveris,

‘Alleluya;

ha'y mog a yskynn trank heb worfenn.’

4Ha'n peswar henavek warn ugens ha'n peswar kreatur bew a goedhas ha gordhya Duw owth esedha war an tron, ow leverel, ‘Amen, Alleluya!’

Goel Demmedhyans an Oen

5Ha lev a dheuth yn-mes a'n tron, ow leverel,

‘Gormelewgh agan Duw,

oll y wesyon

ha'n re a'n own,

byghan ha bras.’

6Ha my a glewas kepar ha pan ve lev routh veur, ha son lies dowr, ha lev taran veur ow leverel,

‘Alleluya;

rag an Arloedh agan19:6 agan: War-lergh re a'n dornskrifow, nyns usi omma an ger ma. Duw,

an Ollgalloesek, a reyn.

7Gwren lowenhe ha heudhhe,

ha ri gordhyans dhodho;

rag dydh demmedhyans an Oen a dheuva,

ha'y wreg re ombareusis.

8Ha res veu dhedhi hi bos gwiskys

yn sendal, splann ha pur’ –

rag an sendal yw oberow gwiryon an syns.

9Hag ev a leveris dhymm, ‘Skrif: Gwynn aga bys an re gelwys dhe woel demmedhyans an Oen.’ Hag ev a leveris dhymm, ‘An re ma yw gwir lavarow Duw.’ 10Ha my a goedhas orth y dreys rag y wordhya. Hag ev a leveris dhymm, ‘Na wra henna. My yw dha geskethwas, ha keskethwas dha vreder a's teves dustuni Yesu. Gwra gordhya Duw, rag dustuni Yesu yw an spyrys a brofoesans.’

An Marghek war an Margh Gwynn

11Ha my a welas nev igerys, hag otta, margh gwynn hag ev neb o esedhys warnodho o henwys Len ha Gwir, hag yn ewnder ev a vreus ha gwerrya. 12Ha'y dhewlagas o kepar ha tan ow flammya, ha war y benn yth esa lies diadem; ha hanow skrifys a'n jevo na wodhya denvyth marnas ev y honan. 13Ha gwiskys o yn mantell troghys yn goes: ha gelwys yw y hanow, ‘Ger Duw.’ 14Ha'n luyow esa yn nev a'n siwyas war vergh gwynn, gwiskys yn sendal, gwynn ha glan. 15Ha kledha lymm a yn-mes a'y anow, may hwasko an kenedhlow ganso, hag ev a wra aga rewlya19:15 rewlya: Greka bugelya gans gwelenn horn, hag ev a drett gwinwask konnar sorr Duw Ollgalloesek. 16Ha war y vantell ha war y vordhos, hanow yw skrifys: Myghtern myghternedh, hag Arloedh arlydhi.

17Ha my a welas unn el ow sevel y'n howl; hag ev a armas, ughel y lev, ow leverel dhe oll an ydhyn ow nija yn kres nev, ‘Dewgh, omguntellewgh war-barth dhe'n goen vras a Dhuw, 18may tepprowgh kig myghternedh, ha kig pennhembrenkysi-luyow, ha kig tus nerthek, ha kig mergh ha'ga marghogyon, ha kig pub den ha rydh ha keth, ha byghan ha bras.’ 19Ha my a welas an best ha myghternedh an norvys ha'ga luyow kuntellys war-barth dhe werrya erbynn neb o esedhys war an margh hag erbynn y lu. 20Ha'n best a veu kemmerys, ha ganso an fals profoes a wrug sinys a-dheragdho, may toellas neb re dhegemmersa merk an best ha neb a wordhya y imaj. An dhew ma a veu tewlys, bew, yn lynn tan ow leski gans loskven. 21Ha'n re erell a veu ledhys gans an kledha a dheuth dhiworth an ganow a neb esa owth esedha war an margh, an kledha a dheuth dhiworth y anow; hag oll an ydhyn a veu lenwys a'ga hig.