An Mil Vlydhen

1Ha my a welas el ow tiyskynna dhiworth nev, gans alhwedh an pytt diwoeles ha chayn bras yn y dhorn. 2Hag ev a settyas dalghenn y'n dhragon, an sarf goth na, yw an Jowl ha Satnas, hag a's kolmas mil vlydhen; 3hag ev a's tewlys y'n pytt diwoeles hag a'n degeas, hag a worras sel warnodho, na doella an kenedhlow namoy bys pan vo an mil vlydhen kowlwrys. A-wosa y koedh dhodho bos delivrys berr dermyn.

4Ha my a welas tronys, hag yth esa owth esedha warnedha an re a veu grontys breus dhedha; ha my a welas an enevow a neb re bia dibennys rag dustuni Yesu, ha rag ger Duw, na wrussa gordhya an best, na'y imaj, ha na wrussa degemmeres an merk war aga thal na'ga diwla, hag i a vewas ha reynya gans Krist mil vlydhen. 5Mes remenant an re varow ny dhasvewsons bys pan veu gorfennys an mil vlydhen. Hemm yw an kynsa dasserghyans. 6Gwynnvys ha sans yw neb a'n jeves rann y'n kynsa dasserghyans: an nessa mernans ny'n jeves galloes vydh warnedha, mes i a vydh oferysi Duw ha Krist, hag a wra reynya mil vlydhen ganso.

7Ha pan vo an mil vlydhen gorfennys, Satnas a vydh delivrys yn-mes a'y brison. 8Hag ev a wra mos yn-mes dhe doella an kenedhlow usi yn peswar sorn an norvys, Gog ha Magog, rag aga huntell war-barth dhe'n gas; ha'ga niver yw kepar ha tewes an mor. 9Hag i a yskynnas war efander an nor hag a omsettyas a-dro dhe gaslys an syns, ha'n sita veurgerys; ha tan a dhiyskynnas20:9 a dhiyskynnas: War-lergh re a'n dornskrifow a dhiyskynnas a Dhuw. yn-mes a nev ha'ga devorya. 10Ha'n jowl neb a's toellas a veu tewlys yn lynn tan ha loskven, le may ma an best ha'n fals profoes, hag ev a vydh tormentys dydh ha nos, trank heb worfenn.

11Ha my a welas tron gwynn meur, ha neb esa owth esedha warnodho, ha nor ha nev a fias dhiworth y fas, ha nyns o tyller kevys ragdha. 12Ha my a welas an re varow, bras ha byghan, ow sevel a-dherag an tron; ha rolyow-skrifa a veu igerys; ha ken rol a veu igerys, yw an lyver a vewnans: ha'n re varow a veu breusys der an pyth o skrifys y'n rolyow, war-lergh aga gwriansow. 13Ha'n mor a dhaskorras an re varow esa ynno hag ankow hag ifarn a dhaskorras an re varow esa ynna, hag y fons i breusys, pubonan war-lergh y wriansow. 14Hag ankow hag ifarn a veu tewlys y'n lynn a dan. Hemm yw an nessa mernans, an lynn a dan. 15Ha seul na veu kevys skrifys y'n lyver a vewnans a veu tewlys y'n lynn a dan.