1Ha my a welas nev nowydh ha nor nowydh: rag an kynsa nev ha'n kynsa nor re dremensa dhe-ves, ha nyns esa mor namoy. 2Ha my a welas an sita sans, Yerusalem nowydh, ow tiyskynna yn-mes a nev dhiworth Duw, parys kepar ha benyn bries afinys rag hy gour. 3Ha my a glewas lev bras yn-mes a'n tron ow leverel,

‘Otta, yma tabernakel Duw gans mab-den,

hag ev a drig gansa,

hag i a vydh y bobel,

ha Duw y honan a vydh gansa.21:3 a vydh gansa: War-lergh re a'n dornskrifow a vydh gansa, ha bos aga Duw.

4Hag ev a sygh pub dagrenn dhiworth aga dewlagas,

ha ny vydh ankow namoy,

na ny vydh keudh, nag oela, nag anken namoy,

rag bos an kynsa taklow tremenys.’

5Ha neb esa owth esedha war an tron a leveris, ‘Otta, nowydh a wrav pup-tra oll.’ Hag ev a leveris dhymm, ‘Skrif, rag len ha gwir yw an geryow ma.’ 6Hag ev a leveris dhymm, ‘Gwrys yw. Alfa hag Omega ov vy, an dalleth ha'n diwedh. My a re dhe neb a'n jeves syghes a fenten an dowr a vewnans heb kost. 7Neb a feth a wra erita an taklow ma; ha my a vydh y Dhuw, hag ev a vydh ow mab. 8Mes an ownogyon, ha'n dhiskryjygyon, ha'n re gasadow, ha denledhysi, ha'n re a wra fornikasyon, ha pystrioryon ha gordhyoryon idolys, ha pub gowleveryas a's teves aga rann y'n lynn a lesk gans tan ha loskven, hag yw an nessa mernans.’

An Yerusalem Nowydh

9Hag onan a'n seyth el neb a's tevo an seyth fiol lenwys a'n seyth pla diwettha a dheuth dhymm ha kewsel orthiv ow leverel, ‘Deus, ha my a vynn diskwedhes dhis an venyn bries, gwreg an Oen.’ 10Hag ev a'm dug dhe-ves y'n spyrys dhe menydh bras hag ughel, ha diskwedhes dhymm an sita sans, Yerusalem, ow tiyskynna yn-mes a nev dhiworth Duw, 11ha gensi golewder Duw, ha'y golow kepar ha men a'n moyha drudh, kepar ha men yasper, mar lan avel gwrys. 12Ha gensi yth esa fos vras hag ughel, ha dewdhek yet, hag orth an yetys dewdhek el, ha henwyn skrifys warnedha, yw a'n dewdhek loeth a vebyon Ysrael. 13Orth an howldrevel yma teyr yet, orth an kledh teyr yet, orth an dyghow teyr yet, hag orth an howlsedhes teyr yet. 14Ha fos an sita a's tevo dewdhek sel, hag ynna henwyn dewdhek abostol an Oen.

15Ha neb a gewsis genev a'n jevo korsenn owrek dhe vusura an sita, ha'y yetys, ha'y fos. 16Ha'n sita a wrowedh pedrek ha'y hys yw kemmys ha'y les; hag ev a vusuras an sita gans an gorsenn, dewdhek mil erowhys. Hy hys ha'y les ha'y ughelder yw kehaval. 17Hag ev a vusuras hy fos, peswar kevelin ha seyth ugens, musur mab-den, henn yw a'n el. 18Ha'y fos o drehevys yn yasper: ha'n sita o owr glan, kepar ha gweder glan. 19Selyow fos an sita o tekhes gans meyn drudh a bub eghenn. An kynsa sel o yasper, an nessa saffir; an tressa kalsedon, an peswora gwyrven, 20an pympes sardonyks, an hweghves sardius, an seythves krysolithus, an ethves beryl, an nawves topaz, an degves krysopras, an unnegves hyakinth, an dewdhegves amethyst. 21Ha'n dewdhek yet o dewdhek perl, pub yet o gwrys dhiworth unn perl, ha plen an sita o owr glan, kepar ha pan ve gweder boll.

22Ha tempel ny welis ynni, rag bos an Arloedh Duw Ollgalloesek ha'n Oen hy thempel. 23Ha dhe'n sita nyns esa edhomm a'n howl nag a'n loer dhe splanna ynni, rag splannder Duw a's golowi, ha'n Oen yw hy lugarn. 24Ha'n kenedhlow a wra kerdhes yn hy golow, ha myghternedh an norvys a wra dri aga gordhyans ha'ga enor a-bervedh ynni hi. 25Ha'y yetys ny vydh deges mann der an jydh, rag ny vydh nos ena. 26Hag i a wra dri gordhyans hag enor an kenedhlow ynni hi. 27Ha ny wra entra ynni travyth y'n bys a vo avlan, na neb a wra tra gasadow, po gowleverel, marnas seul yw skrifys yn lyver bewnans an Oen.