1Hag ev a dhiskwedhas dhymm avon a dhowr bewnans, kler avel gwrys, ow tos yn-mes a dron Duw hag a'n Oen. 2Yn kres hy stret, hag orth pub tu a'n avon, yma gwydhenn bewnans, ow toen dewdhek trevas a frut, ow ri hy frut pub mis, hag yma del an wydhenn rag yaghheans an kenedhlow. 3Ha ny vydh kevys travyth milliges namoy, mes tron Duw ha'n Oen a vydh ynni; ha'y wesyon a wra y wordhya: 4hag i a wel y fas: ha'y hanow a vydh war aga thal. 5Ha ny vydh nos namoy; ha nyns eus edhomm a wolow lugarn po golow howl; drefenn an Arloedh Duw dhe wolowi warnedha: hag i a wra reynya trank heb worfenn.

Devedhyans Krist

6Hag ev a leveris dhymm, ‘An lavarow ma yw len ha gwir; ha'n Arloedh Duw a'n enevow a'n brofoesi a dhannvonas y el dhe dhiskwedhes dh'y wesyon an taklow a goedh hwarvos yn skon. 7Otta, my a dheu yn skon: gwynnvys neb a with lavarow profoesans an rol-skrifa ma.’

8Ha my, Yowann, yw neb a glewas ha gweles an taklow ma. Ha pan glewis ha gweles, my a goedhas dhe wordhya a-dherag treys an el a dhiskwedhas dhymm an taklow ma. 9Hag ev a leveris dhymm, ‘Na wra henna: dha geskethwas ov vy, hag a'th vreder an brofoesi, hag a neb a with lavarow an rol-skrifa ma: gwra gordhya Duw.’

10Hag ev a leveris dhymm, ‘Na wra selya yn-bann lavarow profoesans an rol ma: rag ogas yw an termyn. 11Neb yw kammhynsek, kammhynsek bedhes hwath: ha neb yw plos, plos bedhes hwath: ha neb yw ewn, ewn bedhes hwath: ha neb yw sans, sans bedhes hwath.’

12‘Otta, my a dheu yn skon, hag yma ow gober genev, dhe ri dhe beub kepar dell yw y ober. 13Alfa hag Omega ov vy, an kynsa ha'n diwettha, an dalleth ha'n diwedh.’

14Gwynn aga bys neb a wolgh aga dillas may fo dhedha gwir dhe'n wydhenn a vewnans, ha mayth ellens a-ji dhe'n sita der an yetys. 15A-ves yma an keun, ha'n bystrioryon, ha'n re a wra fornikasyon ha denladh, ha'n re a wordh idolys, ha pubonan a gar ha gul falsuri.

16‘My, Yesu, re dhannvonas ow el dhe dhustunia dhywgh an taklow ma rag an eglosyow. My yw gwreydhenn hag agh Davydh, an Vorlowenn splann.’ 17Hag yn-medh an Spyrys ha'n venyn bries, ‘Deus’, ha leveres neb a glewvo, ‘Deus’, ha des neb a'n jeffo syghes; neb a vynno, kemmeres ev a'n dowr a vewnans heb kost.

18My a dhest dhe seul a glewvo lavarow profoesans an rol-skrifa ma: Den mar keworr travyth dhedha, Duw a geworr dhodho an plaow yw skrifys y'n rol ma; 19ha den mar kemmer dhe-ves travyth dhiworth lavarow rol an profoesans ma, Duw a gemmer y rann dhiworth an wydhenn a vewnans hag yn-mes a'n sita sans yw deskrifys y'n rol ma.

20Neb a dheg dustuni a'n taklow ma, a lever, ‘Dhe wir, my a dheu yn skon.’ Amen, deus, Arloedh Yesu.

21Gras an Arloedh Yesu22:21 Yesu: War-lergh re a'n dornskrifow Yesu Krist. re bo gans pub den oll.22:21 gans pub den oll: War-lergh re a'n dornskrifow gans oll an syns. Amen, po genowgh hwi oll. Amen.