An Gordhyans yn Nev

1Wosa hemma my a viras, hag otta daras igerys y'n nev, ha'n kynsa lev a glewis kepar ha hirgorn ow kewsel genev, ow leverel, ‘Deus yn-bann omma, ha my a vynn diskwedhes dhis an taklow a res hwarvos wosa hemma.’ 2Hag a-dhesempis, yth esen y'n spyrys, hag otta, tron esa gorrys y'n nev, hag onan owth esedha war an tron. 3Hag ev neb o esedhys war an tron a heveli kepar ha men yasper ha sardius, hag yth esa kammneves a-dro dhe'n tron kepar ha gwyrven, 4Hag a-dro dhe'n tron yth esa peswar tron warn ugens; ha war an tronys y hwelis peswar henavek warn ugens owth esedha, gwiskys yn dillas gwynn, ha war aga fenn kurun owrek. 5Hag yn-mes a'n tron y teuth lughesennow ha sonyow ha taranow yn-rag, hag yth esa seyth faglenn tan, yw seyth Spyrys Duw, ow leski a-dherag an tron; 6hag a-dherag an tron yma mor gwedrek, haval dhe wrys.

Hag yn mysk an tron, hag a-dro dhe'n tron peswar kreatur bew leun a lagasow a-rag hag a-dhelergh. 7Ha'n kynsa kreatur bew yw kepar ha lew, ha'n nessa kreatur bew kepar ha leugh, ha'n tressa kreatur bew gans fas den, ha'n peswora kreatur bew kepar hag er ow nija. 8Ha'n peswar kreatur bew, pubonan gans hwegh askell, yw leun a lagasow a-derdro hag a-ji, ha nyns eus powes dhedha dydh ha nos hag i ow leverel,

‘Sans, Sans, Sans,

Arloedh Duw an Ollgalloesek,

neb o, neb yw, ha neb a dheu.’

9Ha pan wra an kreaturs bew ri gordhyans hag enor ha grasow dhe neb yw esedhys war an tron, neb a vew trank heb worfenn, 10an peswar henavek warn ugens a wra koedha dhe'n dor a-dherag neb yw esedhys war an tron, hag omblegya dhe neb a vew trank heb worfenn, ha tewlel aga hurunyow a-dherag an tron, ow leverel,

11‘Gwiw osta, agan Arloedh ha'gan Duw

dhe dhegemmeres gordhyans hag enor ha galloes,

rag ty a wrug pup-tra

ha dre dha vodh yth esens i,4:11 yth esens i: War-lergh re a'n dornskrifow yth esons i. hag y fons i gwrys.’