An Rol-skrifa ha'n Oen

1Ha my a welas y'n dhorn dhyghow a neb o esedhys war an tron, rol-skrifa, skrifys warnedhi a-ji ha war an keyn, selys gans seyth sel. 2Ha my welas el nerthek ow karma, ughel y lev, ‘Piw yw gwiw dhe igeri an rol ha terri hy selyow?’ 3Ha denvyth y'n nev, nag y'n nor nag yn-dann an nor ny ylli igeri an rol, na mires orti hi. 4Ha my a oelas yn feur rag na veu denvyth kevys gwiw dhe igeri ha redya an rol, na mires orti hi. 5Hag onan a'n henavogyon a leveris dhymm, ‘Na wra oela. Otta, lew loeth Yuda, Gwreydhenn Davydh, re fethas dhe igeri an rol ha'y seyth sel.’

6Ha my a welas yn mysk an tron ha'n peswar kreatur bew, hag yn mysk an henavogyon, y sevi Oen kepar ha pan ve ledhys, gans seyth korn ha seyth lagas, yw seyth Spyrys Duw dannvenys yn-rag yn oll an norvys. 7Hag ev a dheuth ha kemmeres an rol yn-mes a'n dhorn dhyghow a neb o esedhys war an tron. 8Ha pan gemmeras an rol, an peswar kreatur bew, ha'n peswar henavek warn ugens a goedhas dhe'n dor a-dherag an Oen, pubonan gans telynn ha fiolyow owrek leun a ynkys, yw pysadow an syns. 9Ha kan nowydh a ganons i, ow leverel,

‘Gwiw osta dhe gemmeres an rol,

hag igeri an selyow,

rag ty a veu ledhys ha re dhasprensys tus dhe Dhuw gans dha woes yn-mes a bub loeth, ha yeth, ha pobel, ha kenedhel;

10ha ty a's gwrug gwlaskor hag oferysi dh'agan Duw,

hag i a wra reynya war an norvys.’

11Ha my a viras, ha klewes lev lies el a-dro dhe'n tron, ha'n kreaturs bew ha'n henavogyon; ha'n niver anedha o deg milweyth deg mil, ha milyow a vilyow, 12ow leverel, ughel aga lev,

‘Gwiw yw an Oen a veu ledhys

dhe dhegemmeres galloes, ha rychys, ha furneth, ha nerth,

hag enor, ha gordhyans, ha bennath.’

13Ha pub kreatur y'n nev, ha war an nor, hag yn-dann an nor, hag y'n mor, ha pup-tra oll ynna i, a glewis vy ow leverel,

‘Dhe neb yw esedhys war an tron, ha dhe'n Oen,

re bo bennath, hag enor, ha gordhyans ha galloes

trank heb worfenn.’

14Hag yn-medh an peswar kreatur bew, ‘Amen.’ Ha'n peswar henavek warn ugens a goedhas dhe'n dor ha gordhya.