An Seythves Sel ha'n Ynkyslester Owrek

1Ha pan igoras an seythves sel, y feu taw y'n nev dres ogas ha hanter our. 2Ha my a welas an seyth el usi ow sevel a-dherag Duw, ha seyth hirgorn a veu res dhedha.

3Ha ken el a dheuth ha sevel orth an alter, hag ynkyslester owrek ganso, ha meur a ynkys a veu res dhodho ma'n proffya gans pysadow an syns oll war an alter owrek esa a-dherag an tron. 4Ha mog an ynkys gans pysadow an syns a yskynnas yn-bann yn-mes a leuv an el a-dherag Duw. 5Ha'n el a gemmeras an ynkyslester, ha'y lenwel a dan an alter ha'y dewlel dhe'n dor, hag y feu taranow ha sonyow ha lughes ha dorgrys.

An Hirgern

6Ha'n seyth el ha gansa an seyth hirgorn a ombareusis dh'aga hwytha.

7Ha'n kynsa a hwythas hag y siwyas keser ha tan kemmyskys gans goes hag a veu tewlys dhe'n dor, ha'n tressa rann a'n norvys a veu leskys, ha'n tressa rann a'n gwydh a veu leskys hag oll an gwyrwels a veu leskys.

8Ha'n nessa el a hwythas, hag y feu tewlys y'n mor kepar ha pan ve menydh meur ow leski gans tan; ha'n tressa rann a'n mor eth ha bos goes; 9ha'n tressa rann a'n kreaturs esa y'n mor, ha bewnans gansa, a verwis, ha'n tressa rann a'n gorholyon a veu distruys.

10Ha'n tressa el a hwythas, ha sterenn vras a goedhas a'n nev ow leski kepar ha faglenn, ha hi a goedhas war an tressa rann a'n avonyow, ha war an fentynyow a dhowrow. 11Ha hanow an sterenn yw fuelenn, ha'n tressa rann a'n dowrow eth ha bos fuelenn, ha lies den a verwis drefenn an dowrow, rag aga bos gwrys hwerow.

12Ha'n peswora el a hwythas hag y feu an tressa rann a'n howl gweskys, ha'n tressa rann a'n loer ha'n tressa rann a'n ster, may feu an tressa rann anedha tewlhes ha ny omdhiskwedhas an jydh rag an tressa rann anodho, ha'n nos kekeffrys.

13Ha my a welas ha klewes er ow nija yn kres an nev, ow leverel, ughel y lev, ‘Tru, tru, tru, dhe drigoryon an norvys dhiworth sonyow erell a hirgorn an tri el neb a vydh ow hwytha.’