1Ha'n pympes el a hwythas, ha my a welas sterenn koedhys dhiworth an nev bys y'n nor: hag alhwedh shafta an pytt diwoeles a veu res dhodho. 2Hag ev a igoras shafta an pytt diwoeles ha mog a yskynnas yn-mes a'n shafta kepar ha mog fornes vras ha'n howl ha'n ayr a veu tewlhes dre vog an shafta. 3Ha lokustes a dheuth yn-mes a'n mog dhe'n dor ha galloes a veu res dhedha kepar dell eus galloes dhe skorpyons an dor. 4Hag y feu erghys dhedha na bystikkens gwels an dor, na travyth gwer, na gwydhenn vyth, marnas an dus na yn unnsel na's teffo sel Duw war aga thal. 5Hag y feu grontys dhedha na's latthens, mes may fens tormentys dre bymp mis ha'ga fayn o kepar ha payn skorpyon pan big den. 6Hag y'n dydhyow na, tus a wra hwilas ankow, ha ny'n kevons, ha merwel a vynnons, ha mernans a vynn fia dhiworta i.

7Ha semlans an lokustes o kepar ha mergh parys dhe gas, hag yth esa semlans kurunyow owrek war aga fennow, ha'ga fas o haval dhe fas den, 8Hag yth esa gols dhedha kepar ha gols benyn, ha dyns kepar ha dyns lew. 9Ha lurigow esa dhedha kepar ha lurigow a horn, ha son aga eskelli o kepar ha son lies charett gans mergh ow resek dhe gas. 10Ha lost yma dhedha kepar ha skorpyons, ha bros; hag yn aga lost yma galloes a bystiga tus dre bymp mis. 11Yma myghtern a-ughta i, yw el an pytt diwoeles, yn Ebrow Abaddon y hanow, hag yn Greka Apollyon.

12Unn tru re dremenas; otta, y teu dew dru wosa henna.

13Ha'n hweghves el a hwythas, ha my a glewas unn lev dhiworth an peswar korn a'n alter owrek a-dherag Duw, 14ow leverel dhe'n hweghves el ha ganso an hirgorn, ‘Lows an peswar el yw kelmys war an avon veur Ewfrates.’ 15Hag y feu lowsys an peswar el re bia gwithys yn parys dhe'n eur ha'n jydh ha'n mis ha'n vlydhen, may latthens an tressa rann a vab-den. 16Ha'n niver a'n lu a varghogyon o dew kans milvil, ha my a glewas an niver anedha. 17Hag yndella my a welas an vergh y'n welesigeth, ha'n re owth esedha warnedha gans lurik liw tan, hyakinth, ha loskven, ha penn an vergh o kepar ha penn lewyon, ha tan ha mog ha loskven a dheu yn-mes a'ga ganow. 18Der an tri fla ma y feu ledhys an tressa rann a vab-den der an tan ha'n mog ha'n loskven ow tos yn-mes a'ga ganow. 19Rag yma galloes an vergh yn aga ganow ha'ga lost, rag yth o aga lost kepar ha sarf, hag y's teves penn may hwrons i pystiga.

20Ha'n re erell a vab-den na veu ledhys gans an plaow ma, ny gemmeras edrek hwath a wriansow aga diwla, dhe omwitha dhiworth gormel dywolow hag idolys owrek, hag arghansek, hag a vrest hag a brenn na yllons gweles na klewes na kerdhes. 21Ha ny gemmersons edrek a'ga ladhvaow na a'ga fystri, na a'ga fornikasyon, na a'ga ladrans.