Salusyans

1Powl, gwas a Yesu Krist, gelwys dhe vos abostol, diberthys dhe aweyl Duw 2a ragambosas dre y brofoesi yn skryptors sans, 3a-dro dh'y Vab devedhys a has Davydh war-lergh an kig 4hag a veu henwys Mab Duw yn nerth war-lergh Spyrys sansoleth dre dhasserghyans an re varow, Yesu Krist agan Arloedh; 5may kemmersyn gras hag abostolieth dredho rag dri gostytter fydh yn mysk oll an kenedhlow a-barth y hanow ev, 6yn aga mysk dell esowgh hwi ynwedh, gelwys dhe vos dhe Yesu Krist:

7Dhe'n re oll usi yn Rom, kerys gans Duw, gelwys dhe vos syns:

Gras dhywgh hwi ha kres a Dhuw agan Tas ha'n Arloedh Yesu Krist.

Powl a Vynn Mos dhe Rom

8Kyns oll, yth aswonnav gras dhe'm Duw dre Yesu Krist ahanowgh hwi oll, drefenn agas fydh dhe vos dyllys y'n norvys oll. 9Rag Duw yw ow dustunier, mayth esov orth y servya gans ow spyrys yn aweyl y Vab, fatell y'gas kampoellav heb hedhi, 10pup-prys y'm pysadow ow pysi may sewenav ow tos dhywgh wostiwedh war neb kor dre vodh Duw. 11Rag my a yeun agas gweles rag may rynniv dhywgh neb ro spyrysel dh'agas krevhe, 12hemm yw, rag may fyn ni kennerthys an eyl gans fydh y gila, keffrys agas fydh hwi hag ow fydh vy. 13Ny vynnav, breder, hwi dhe vos heb godhvos bos ow bodh yn fenowgh dos dhywgh (mes bys y'n eur ma my re beu lettys), rag may kyffiv nebes trevas yntredhowgh keffrys hag ynter an kenedhlow erell. 14Dhe Grekys keffrys ha dhe varbares, dhe'n re fur keffrys ha'n re foll yth ov kendoner: 15ytho mall a'm beus oll dhe'm galloes a bregoth dhywgh ynwedh an re usi yn Rom.

Galloes an Aweyl

16Rag ny'm beus meth a'n aweyl: galloes Duw dhe selwel yw hi dhe geniver a grys, dhe'n Yedhow yn kynsa ha dhe'n Grek keffrys. 17Rag ewnder Duw yw diskwedhys ynni a fydh dhe fydh dell re beu skrifys, ‘An den gwiryon a vew dre fydh.’

Kammweyth Mab-den

18Rag diskwedhys yw sorr Duw dhiworth nev erbynn oll ansansoleth ha kammhynseth a dus a lett an gwirder yn kammhynseth. 19Rag an dra a yll bos aswonnys a-dro dhe Dhuw yw apert dhedha, rag Duw re'n diskwedhas dhedha. 20Rag y gnas na veu gwelys a-dhia greasyon an bys, hemm yw y alloes heb finweth ha'y dhuwsys, re beu gwelys yn tiblans der an taklow gwrys. Ytho heb askus yns; 21rag kynth aswonnens Duw ny'n gormolens na ny aswonnens grasow dhodho avel Duw, mes euver y teuthons ha bos yn aga thybyansow ha tewlhes veu aga holonn dalsogh. 22Owth omwul fur, gyllys foll ens, 23ha treylya golewder Duw na verow yn hevelep imaj densys a beder hag ydhyn hag enyvales peswar-troesek ha pryves.

24Yndella Duw a's gasas yn drokhwansow aga holonn, dhe blosedhes, dhe dhisenora aga horf yntredha, 25neb a dreylyas gwirder Duw yn gow hag a wordhya ha servya an kreatur yn le an Gwrier, yw benniges bys vykken. Amen.

26Rakhenna Duw a's gasa dhe dhrokhwansow disenorys. Aga benynes a geschanjyas an gis naturel gans gis dinatur, 27ha'n wer ynwedh ow kasa an gis naturel gans benynes a loskas yn aga yeunadow an eyl war-lergh y gila, gwer ow fara divlas gans gwer hag ow kemmeres ynna aga honan an pewas gwiw yn attal dh'aga hammwrians.

28Ha drefenn nag o da gansa aswonnvos Duw, Duw a's gasas dhe dhrog vrys ha dhe fara divlas. 29Gorlenwys ens a bub kammhynseth, droktra, krefni, atti.1:29 a bub kammhynseth, droktra, krefni, atti: War-lergh re a'n dornskrifow a bub kammhynseth, dijastita, droktra, krefni, atti. Leun a avi, moldra, strif, toell, spit, hwystroryon yns, 30sklandroryon, kasoryon Duw, tus ow tespitya, tus arvedhus, tus valgh, bostoryon, towloryon droktra, diwostydh dhe gerens, 31tus anfur, dislen, dibita, didruedh. 32Kyn hwodhons ordenans Duw may tegoedh an mernans dhe'n re a wra taklow a'n par ma, ny's gwrons yn unnsel mes plegadow gansa yw an re a's gwra.