1A vreder, yeunes ow holonn ha'm pysadow dhe Dhuw yw rag selwyans dhedha.10:1 dhedha: War-lergh re a'n dornskrifow dhe Ysrael. 2My a dheg dustuni ragdha, i dhe vos diwysyk war-lergh Duw mes nyns yw herwydh godhvos. 3Rag heb godhvos a ewnder Duw, hag ow hwilas sevel aga ewnder aga honan, nyns ens gostydh dhe ewnder Duw. 4Rag Krist yw penn an lagha rag ewnder dhe beub a grys.

Selwyans rag Oll

5Rag Moyses a skrif a-dro dhe ewnder an lagha, ‘An den a wra an taklow ma a vew dredha.’ 6Mes an ewnder usi a fydh a lever yndella: ‘Na lavar y'th kolonn, “Piw a yskynn y'n nev?” ’ (hemm yw dhe dhri Krist yn-nans) 7‘po “Piw a dhiyskynn y'n islonk?” ’ (hemm yw dhe dhri Krist yn-bann a vernans). 8Mes pandr'a lever ev?

‘Yma an ger yn ogas dhis,

yn dha anow hag y'th kolonn’

henn yw, an ger a fydh a bregewthyn. 9Rag mar konfessydh yn dha anow Yesu dhe vos Arloedh ha krysi y'th kolonn y hwrug Duw y dhrehevel a'n mernans, y fydhydh selwys. 10Rag gans kolonn y krysir dhe ewnder ha gans ganow y konfessir dhe selwyans. 11Rag an skryptor a lever, ‘Ny'n jevydh meth neb a grysso ynno.’ 12Rag nyns eus dihevelepter ynter an Yedhow ha'n Grek, an keth Arloedh yw dhe oll, a re y rychys dhe oll a elow warnodho. 13Rag, ‘Neb a elwo war hanow an Arloedh a vydh selwys.’

14Fatell yll tus gelwel war nebonan ma na gryssons ynno? Ha fatell yllir krysi dhe nebonan ma na glewas anodho; ha fatell yllir klewes heb pregowther? 15Ha fatell yllir pregoth mar nyns or dannvenys? Dell yw skrifys, ‘Ass yns i teg treys an re ow tyllo nowodhow da!’10:15 an re ow tyllo nowodhow da: War-lergh re a'n dornskrifow an re ow tyllo kres, (hag) ow tyllo nowodhow da. 16Mes nyns o pubonan gostydh dhe'n aweyl; rag Ysay a lever, ‘A Arloedh, piw a grysis agan derivas?’ 17Ytho fydh a dheuth a glewes, ha'n klewes dre eryow Krist.10:17 dre eryow KristWar-lergh re a'n dornskrifow dre eryow Duw.

18Mes my a lever, A wrussons i klewes? Gwrussons yn hwir! Rag

‘Dhe'n bys oll yth eth aga lev,

ha'ga geryow dhe bennow an norvys.’

19Mes y lavarav, A ny gonvedhas Ysrael? Wostalleth Moyses a lever,

‘My a wra dhis perthi avi orth an re nag yns kenedhel,

hag orth an re yw kenedhel dalsogh y hwrav dhis serri.’

20Mes Ysay yw hardh hag a lever,

‘Kevys veuv gans an re nag esens orth ow hwilas,

diskwedhys veuv dhe'n re nag esens ow kovynn war ow lergh.’

21Mes dhe Ysrael ev a lever, ‘Oll an jydh yth ystynnen ow diwleuv dhe bobel dhiwostydh ha gorth.’