Remenant Ysrael

1Ytho y lavarav, a dewlis Duw y bobel dhe-ves? Bynner re bo! Rag my yw Ysraelyas dhiworth has Abraham, a eghenn Benyamin. 2Ny dewlis Duw y bobel dhe-ves neb a ragaswonnis ev. Po a ny wodhowgh hwi pandr'a lever an skryptor a-dro dhe Elias, fatell bys ev Duw erbynn Ysrael? 3‘A Arloedh, dha brofoesi a ladhsons, dha alteryow re dhistrusons ha my a veu gesys ow honan hag i a hwila ow bewnans.’ 4Mes pandr'a lever dhodho an gorthyp duwel? ‘My re withas dhymmo vy ow honan seyth mil wour na blegsons aga glin a-rag Baal.’ 5Ytho yndella y'n eur ma yma remenant herwydh dewis a ras. 6Ha mars yw a ras, nyns yw na fella a oberow, po ny via gras na fella gras.11:6 na fella a oberow, po ny via gras na fella gras: War-lergh re a'n dornskrifow na fella gras. Mes mars yw a oberow, ena nyns yw na fella gras, poken an ober nyns yw ober na fella.

7Pandra ytho? Ysrael a fyllis a gavoes an pyth a hwila. An re dhewisys a'n kavas ha'n re erell a veu kaleshes, 8dell yw skrifys,

‘Duw a ros dhedha spyrys a dalsoghter,

dewlagas heb gweles,

ha diwskovarn heb klewes,

bys y'n jydh hedhyw.’

9Ha Davydh a lever,

‘Bedhes aga moes maglenn ha roes

hag antell hag attal dhedha;

10bedhes tewlhes aga dewlagas bys ma na's teves gweles

ha'ga heyn pup-prys ow plegya.’

Selwyans an Kenedhlow

11My a lever ytho, A drebuchsons i rag may koetthens? Bynner re bo! Mes der aga threuspass deuva selwyans dhe'n kenedhlow, bys ma'n jeves Ysrael avi. 12Mes mars yw aga threuspass rychys rag an bys, ha mars yw aga difyk devedhys ha bos rychys rag an kenedhlow, kemmys moy aga leunder!

13Mes dhywgh hwi y lavarav, A genedhlow, seul gemmys ytho dell ov abostol dhe'n kenedhlow, y feurhav ow gonis 14rag may hwrylliv dhe'n re yw a'm kig evy perthi avi, hag yndella selwel rann anedha. 15Rag mars yw aga thewlel dhe-ves unnverheans an bys, pyth yw aga degemmeres marnas bewnans a vernans? 16Ha mars yw an kynsa frut sans, yndella ynwedh yw an toes gwrys anedhi; ha mars yw an wreydhenn sans, yndella yw an skorrennow.

17Mes mar pe rann a'n skorrennow terrys dhe-ves ha ty, olewenn woedh, ympys yn aga le dhe gevrenna yn gwreydhenn ha sugen an olewenn,11:17 yn gwreydhenn ha sugen an olewenn: War-lergh re a'n dornskrifow yn gwreydhenn sugnus an olewenn. 18na vost war an skorrennow, mes mar postydh, an wreydhenn a'th teg ha ny dhegedh an wreydhenn. 19Ty a lever ytho: ‘Terrys dhe-ves veu skorrennow rag may fen vy ympys a-ji.’ 20Gwir yw! Drefenn diskryjyans y fons i terrys, ha ty dre gryjyans a sev. Na gemmer goeth, mes porth own! 21Rag mar ny sparyas Duw an skorrennow naturel, ny'th spar11:21 ny'th spar: War-lergh re a'n dornskrifow martesen ny'th spar. tejy. 22Gwel ytho kuvder hag sevureth Duw; sevureth a'n eyl tu orth an re re goedhas hag a'y gila kuvder Duw orthis, mar pesydh yn y guvder, poken y fydhydh treghys dhe-ves ynwedh. 23Ha'n re na ynwedh, mar ny besyons yn aga diskryjyans, a vydh ympys a-ji, rag Duw a yll aga dasympya a-ji. 24Ty mar peus treghys dhiwar olewenn yw dre natur goedh, hag ympys (ha hemma erbynn natur) yn olewenn vegys, a gemmys moy y fydh an skorrennow naturel dasympys a'ga olewenn aga honan.

Dassevel Ysrael

25Rag ny vynnav hwi dhe vos heb godhvos, a vreder, a'n kevrin ma, ma na vewgh ynnowgh hwi agas honan fur: kalesenn dhe vos devedhys yn rann war Ysrael, bys pan dheffo a-ji an myns kowal a'n kenedhlow, 26hag yndella oll Ysrael a vydh selwys, dell re beu skrifys,

‘Y teu an Delivrer yn-mes a Sion,

ev a dreyl ansansoleth dhe-ves dhiworth Yakob;

27ha hemma a vydh ow hevambos gansa

pan dhegav aga feghosow dhiworta.’

28Ow tochya an aweyl, eskerens yns dhe Dhuw, a'th wovis; mes ow tochya dewisyans, kerys yns a-barth an tasow. 29Rag antreylyadow yw rohow ha galow Duw. 30Rag dell ewgh hwi kyns diwostydh dhe Dhuw mes lemmyn re gevsowgh tregeredh der aga diwostytter, 31yndella i ynwedh re beu diwostydh lemmyn rag may kaffons tregeredh der an dregeredh re gevsowgh. 32Rag Duw re dhegeas oll yn diwostytter rag may tiskwettho tregeredh dhe beub.

33O, downder rychys Duw ha'y furneth ha'y wodhvos! Ass yw y vreus dres konvedhes, ha dres hwithra y fordhow!

34‘Rag piw a wodhya brys an Arloedh,

po piw a dheuth ha bos y gusulyer?

35Po piw re ros ro dhodho kyns,

may fe attylys dhodho?’

36Rag anodho ha dredho ha dhodho yma pup-tra. Dhodho re bo gordhyans bys vykken!