An Bewnans Nowydh yn Krist

1My a'gas pys, a vreder, dre druedhow Duw, may proffyowgh agas korf avel sakrifis bew, sans, plegadow dhe Dhuw, hag yth yw agas gwir wonis spyrysel; 2ha na vedhewgh keskonformys orth an oes ma, mes bedhewgh dasformys dre nowydhheans an brys, rag may preffowgh pandra yw bodh Duw, hag yw da ha plegadow ha perfydh.

3Rag y lavarav der an ras res dhymm dhe beub usi yn agas mysk na'n jeffo tybyansow ughel dres an pyth y tegoedh y dybi, mes may typpo gans brys sevur, herwydh an myns a fydh a rannas Duw dhodho. 4Rag dell y'gan beus yn unn korf lies esel, mes heb bos dhe'n eseli oll an keth gweythres, 5yndella ni, pals dell on, unn korf on yn Krist ha pub huni eseli an eyl a'y gila. 6Ha dhyn ni rohow herwydh an gras re beu res dhyn, hag i dihaval: neb a brofoes, re brofoesso herwydh myns an fydh; 7neb a serv, re serfyo; neb a dhysk, re dhysko; 8neb a gennerth, re gennertho neb a gevrenn, re gevrenno yn sempledh; neb a hembronk, re hembronko yn tiwysyk; neb a dhiskwa tregeredh, re bo gans lowena.

Rewlys an Bewnans Kryjyk

9Gwres kerensa bos gwiryon; kesewgh an drog, glenewgh orth an da; 10ow kara an eyl y gila, yn keskerensa, ow kesstrivya an eyl gans y gila ow tiskwedhes enor; 11yn diwysykter heb sygerneth, yn spyrys owth enowi, ow servya an Arloedh, 12yn govenek ow lowenhe, yn galar ow tiskwedhes perthyans, ow pesya yn tiwysyk yn pysadow, 13ow provia rag edhommow an syns, ow siwya helder.

14Bennigewgh an re a'gas helgh, bennigewgh ha na vollethewgh. 15Lowenhewgh gans an re a lowenha, oelewgh gans an re a oel; 16bedhewgh yn akord an eyl gans y gila; heb gul vri a'n taklow ughel, mes dhe'n re uvel ow plegya;12:16 dhe'n re uvel ow plegya: Po omrewgh dhe oberow uvel. na vedhewgh goethus. 17Na attelewgh drog dhe dhenvyth orth drog; prederewgh a daklow da a-rag tus oll; 18Mar kyllir, myns may hyllowgh, ow hwilas kres gans tus oll. 19Na omdhialewgh, hwi garadowyon, mes rewgh le dhe gonnar Duw; rag skrifys yw, ‘Dial yw dhymm, my a attal’, yn-medh an Arloedh. 20Mes pella, ‘Mars eus nown dhe'th eskar, mag e; mars eus syghes dhodho, ro diwes dhodho; rag ow kul hemma ty a worr bern a golennow bew war y benn.’ 21Na vedhewgh fethys gans an drog, mes fethewgh an drog gans an da.