Gostytter dhe Rewloryon

1Bedhes pub enev gostydh dhe'n ughella routers. Rag nyns eus galloes marnas a Dhuw, ha'n re a gevir re beu ordenys gans Duw. 2Ytho neb a sev erbynn an galloes re sevis erbynn an pyth a ordenas Duw, ha'n re re sevis a's tevydh breus. 3Rag nyns yw an routers own dhe'n ober da mes dhe'n drogober. A vynnses jy bos heb own a'n galloes? Gwra an da, ha ty a' fydh gormola ganso. 4Rag gwas Duw yw ev rag dha dhader. Mar kwredh drog, porth own, rag ny dheg ev an kledha yn euver. Gwas Duw yw ev, dialor rag konnar war an drogoberer. 5Ytho res yw bos gostydh, nyns yw unnsel drefenn konnar mes drefenn kowses ynwedh. 6Rag an keth skila y telydh trubyt, rag an routers yw gwesyon Duw prest owth omri poran dhe'n keth tra ma. 7Tal dhedha i oll an pyth a dhelledh y dyli, trubyt dhe'n re a dal dhedha y dyli, toll dhe'n re a dal dhedha y dyli, agha dhe'n re a dal dhedha agha, enor dhe'n re a dal dhedha enor.

Kerensa an Vreder

8Na vydh kendoner marnas yn kerensa an eyl dh'y gila; rag neb a gar y gentrevek, henna re gowlwrug an lagha. 9An gorhemmynnow, ‘Na wra avoutri, Na wra ladha, Na wra ladra, Na wra hwansa’, ha py gorhemmynn arall pynag a vo, yw synsys y'n lavar, ‘Gwra kara dha gentrevek par dell omgerydh.’ 10Ny wra kerensa drog dhe gentrevek, ytho kerensa yw kowlwrians an lagha.

Nesa Dydh Krist

11Gans henna ow kodhvos an termyn, an eur yw hwi13:11 hwi: War-lergh re a'n dornskrifow ni. dhe dhifuna a gosk. Rag yma selwyans nes dhyn lemmyn es dell o pan gryssyn ni wostalleth. 12Gyllys pell yw an nos ha devedhys nes yw an jydh. Tewlyn dhe-ves ytho oberow an tewlder ha gwiskyn arvow an golow. 13Omdhegyn yn onest dell wren y'n jydhweyth, heb bos yn kevewiow gwyls na medhwynsi, heb bos yn dijastita na drokhwansow direwl, heb bos yn kedrynna na perthi avi. 14Mes gwisk an Arloedh Yesu Krist, ha na dharbar dhe'n kig, rag y lustys.