Na Vreus Dha Vroder

1Ha neb yw gwann y'n fydh, degemmerewgh e heb dadhla a-dro dhe dybyansow. 2Onan a grys y hyll dybri pup-tra, mes an den gwann ny dheber saw unnsel losow; 3na wres neb a dheber skornya ev neb na dheber, ha na wres neb na dheber breusi ev neb a dheber, rag Duw re'n degemmeras. 4Piw os jy hag a vreus servont den arall? A-rag y vester y honan y sev po y koedh. Ha skoedhys vydh, rag Duw14:4 Duw: War-lergh re a'n dornskrifow an Arloedh. a yll gul dhodho sevel.

5Unn den a syns unn jydh gwell ages dydh arall, ha den arall a syns pub dydh par. Bedhes peub sur yn y vrys y honan. 6Neb a syns dy'goel, dhe'n Arloedh y'n syns, ha neb a dheber, dhe'n Arloedh y teber rag yth aswonn gras dhe'n Arloedh; ha neb na dheber, ny dheber ev dhe'n Arloedh hag ev a aswonn gras dhe Dhuw.

7Ny vew nagonan ahanan dhodho y honan ha ny verow nagonan dhodho y honan. 8Mar pewyn, dhe'n Arloedh y pewyn ha mar merwyn, dhe'n Arloedh y ferwyn; ytho bewa po merwel mar kwren, dhe'n Arloedh yth on. 9Rakhenna Krist a verwis ha dasvewa,14:9 a verwis ha dasvewa: War-lergh re a'n dornskrifow a verwis ha dasserghi ha dasvewa. rag may fe Arloedh an re varow ha'n re vew.

10Prag y freusydh dha vroder, po prag y skornydh dha vroder? Rag ni oll a wra sevel a-rag barr Duw.14:10 Duw: War-lergh re a'n dornskrifow Krist. 11Rag skrifys yw,

‘Dell vewav, yn-medh an Arloedh, pub glin a wra plegya dhymmo vy

ha pub taves a wormel Dhuw.’

12Ytho peub ahanan a re akont dhe Dhuw yn y gever y honan.

Na Wra dhe'th Vroder Trebuchya

13Ytho na vreusyn an eyl ahanan y gila mes breusyn yn kynsa na worryn men trebuchya po maglenn yn fordh an broder. 14My a woer ha gwrys sur ov gans an Arloedh Yesu, nag yw travyth kemmyn dredho y honan, mes gans an den a dyb y vos kemmyn, kemmyn yw. 15Mes mara'n jevydh dha vroder offens der an pyth a dhybrydh, ny gerdhydh na fella yn kerensa. Na as dha voes dhe dhistrui nebonan may ferwis Krist a'y wovis. 16Ytho na as may fo agas da dampnys. 17Rag nyns yw gwlaskor Duw dybri nag eva mes ewnder ha kres ha lowender y'n Spyrys Sans; 18neb a serv Krist yndella yw plegadow gans Duw ha kevys da gans tus. 19Holyn ytho taklow a gres ha'n taklow may trehav dredha an eyl y gila. 20Na dhistru a-barth boes ober Duw. Pup-tra yw glan yn tevri mes kamm yw nebonan dhe wul may trebucchyo re erell der an pyth a dheber ev. 21Ewn yw bos heb dybri kig po eva gwin po bos heb gul travyth hag a wra may trebucchyo dha vroder.14:21 dha vroder: War-lergh re a'n dornskrifow dha vroder, na bos offendys, na bos gwannhes. 22An fydh a'th eus,14:22 An fydh a'th eus: War-lergh re a'n dornskrifow Fydh a'th eus? gwith hi ragos dha honan a-rag Duw; gwynnvys neb na omvreus y'n pyth yw da ganso. 23Mes neb a'n jeves dout, dampnys yw ev mar teber, rag ny'n gwra a fydh; rag oll na dheu a fydh yw pegh.