Ples Re Erell, a-der Dha Blesya dha Honan

1Y tegoedh dhyn ni neb yw krev perthi difygyow an re wann, heb omblesya. 2Plegyn ni, peub ahanan, dh'y gentrevek rag da, rag y dhrehevel. 3Rag ny omblesya Krist; rag dell yw skrifys, ‘Kabel an re a'th kabla a goedhas warnav.’ 4Rag pypynag a veu skrifys kyns a veu skrifys rag agan dyski, rag may hwrellen der agan perthyans ha dre gonfort an skryptors, kavoes govenek. 5Re rollo dhywgh an Duw a berthyans hag a gonfort may fewewgh yntredhowgh y'n keth kessenyans herwydh Krist Yesu, 6rag may hwormollowgh war-barth gans unn ganow Duw ha Tas agan Arloedh Yesu Krist.

An Aweyl rag Yedhewon ha'n Kenedhlow War-barth

7Kemmerewgh ytho an eyl y gila, par dell re'gas kemmeras Krist rag glori Duw. 8Rag y lavarav dhywgh y teuth Krist ha bos menyster dhe'n re drodreghys rag gwirder Duw, rag surhe an ambosow a veu res dhe'n tasow, 9ha rag may hwormolla an kenedhlow Duw rag y dregeredh. Dell yw skrifys,

‘Rakhenna my a vynn dha wormel yn mysk an kenedhlow

ha kana dhe'th hanow jy’;

10hag arta ev a lever,

‘Lowenhewgh, A genedhlow oll, gans y bobel!’

11hag arta,

‘Gormelewgh an Arloedh, an kenedhlow oll,

hag a'n gormeles an poblow oll!’

12Hag arta Ysay a lever,

‘Gwreydhenn Yesse a dheu,

neb a sev dhe rewlya an kenedhlow,

ynno an kenedhlow a's tevydh govenek.’

13Re'gas lanwo an Duw a wovenek a bub lowender hag a gres yn krysi, rag may palshahowgh yn govenek dre alloes an Spyrys Sans.

An Charj dhe Powl avel Aweyler

14Ha surhes ov ow honan, ow breder, yn agas kever, hwi ynwedh dhe vos leun a dhader, lenwys a bub godhvos, had abel dhe ri kusul an eyl dh'y gila.15:14 dhe ri kusul an eyl dh'y gila: Po dhe geski an eyl y gila. 15Ha my a skrifas dhywgh moy hardh, yn rann dhe dhri dh'agas kov, der an ras a veu res dhymm gans Duw, 16rag may fiv vy menyster Yesu Krist dhe'n kenedhlow, avel oferyas dhe aweyl Yesu Krist rag may fo offrynn an kenedhlow kemmeradow, sanshes gans an Spyrys. 17Bostya a'm beus yn Yesu Krist rag an gonis rag Duw. 18Rag ny vynnav bedha kewsel a-dro dhe dravyth a-der an pyth a wrug Krist ynnov dhe wul an kenedhlow gostydh, dre er ha dre ober, 19dre alloes toknys ha marthusyon, dre alloes Spyrys Duw, bys may hyllyn kowlwul pregoth aweyl Yesu Krist dhiworth Yerusalem hag yn kylgh bys yn Illyrikum, 20yndella fest ow strivya pregoth an aweyl, y'n tylleryow ma na veu henwys Krist kyns, rag na dhreheffen war sel onan arall, 21mes dell yw skrifys,

‘An re ma na veu pregewthys dhedha a wel,

ha'n re na glewsons a wra konvedhes.’

Towl Powl dhe Vos dhe Rom

22Yndella fest yn fenowgh lettys veuv na dheuth vy dhywgh. 23Mes lemmyn nyns eus tyller dhymm y'n ranndiryow ma, ha hwans re'm beu a dhos dhywgh nans yw nebes blydhynyow, 24pan wrylliv vyajya dhe Spayn. Rag govenek a'm beus, pan dremenav dresowgh, a'gas gweles ha genowgh dhe vos dannvenys war ow fordh, wosa my dhe vos lenwys ahanowgh yn rann. 25Mes lemmyn my a dhe Yerusalem ow menystra dhe'n syns. 26Rag da o gans Makedonia hag Aghaia provia nebes rag an voghosogyon yn mysk an syns yn Yerusalem. 27Rag da o gansa ha kendonoryon dhedha yns, rag mar kevrenna an kenedhlow gansa yn aga thaklow spyrysel, y tegoedh dhedha ynwedh yn taklow a'n kig menystra dhedha. 28War-lergh gorfenna hemma ytho ha war-lergh selya dhedha an frut ma, yth av dredhowgh dhe Spayn; 29ha my a woer, pan dhyffiv, y hwrav dos dhywgh yn leunder bennath Krist.15:29 bennath Krist: War-lergh re a'n dornskrifow bennath aweyl Krist.

30My a'gas pys, a vreder, der agan Arloedh Yesu Krist, ha dre gerensa an Spyrys may striffyowgh genev yn agas pysadow dhe Dhuw a'm govis, 31rag may fiv delivrys a'n dhiskryjygyon yn Yudi ha may fo ow gonis rag Yerusalem degemmeradow dhe'n syns, 32rag may tyffiv dhywgh yn lowender dre vodh Duw ha powes genowgh. 33Ha'n Duw a gres re bo genowgh hwi oll. Amen.