Gorhemmynnow Personel

1My a gommend dhywgh agan hwoer, Febe, servyades a'n eglos yn Kenkrea, 2rag ma's degemmerrewgh y'n Arloedh, dell dhelledh dhe'n syns, ha sevel rygdhi yn pypynag a's teffo edhomm anodho, rag hi re beu gwithyades dhe lies ha dhymmo vy ynwedh.

3Salusewgh Priska hag Akwila, ow hesoberoryon yn Krist Yesu, 4neb a-barth ow bewnans a beryllyas aga honna aga honan mayth aswonnyn gras dhedha, my ow honan, mes ynwedh oll eglosyow an kenedhlow; 5salusewgh ynwedh an eglos yn aga chi. Salusewgh ow Epaynetus karadow hag a veu an kynsa frut yn Asia rag Krist. 6Salusewgh Maria neb re lavuryas meur ragowgh. 7Salusewgh Andronikus ha Yunia, ow herens ha'm kesprisnoryon, hag yw tus a vri yn mysk an abesteli, hag yn tevri re beu yn Krist a-ragov. 8Salusewgh Ampliatus, ow haradow y'n Arloedh. 9Salusewgh Urbanus agan kesoberer yn Krist ha Staghys ow haradow. 10Salusewgh Apelles, neb yw kommendys yn Krist. Salusewgh eseli teylu Aristobulus. 11Salusewgh Herodion, ow har. Salusewgh an re usi y'n Arloedh a ji Narkissus. 12Salusewgh Tryfena ha Tryfosa an re ow lavurya y'n Arloedh. Salusewgh Persis an garadow, neb a lavurya meur y'n Arloedh. 13Salusewgh Rufus yw dewisys y'n Arloedh ha'y vamm ev ha'm mamm vy ynwedh. 14Salusewgh Asynkritus, Flegon, Hermes, Patrobas, Hermas ha'n vreder usi gansa. 15Salusewgh Filologus, Yulia, Nereus ha'y hwoer, hag Olympas hag oll an syns usi gansa. 16Salusewgh an eyl y gila gans amm sans. Oll eglosyow Krist a'gas salus.

17My a'gas pys, breder, omwithewgh orth an re a wra folsyow hag offensys a-der an dyskas a dhys'sowgh, ha treylyewgh a-dhiworta. 18Rag tus a'n par na, ny servyons agan Arloedh Krist mes aga thorr aga honan, ha dre gows teg ha dre gows ow flattra, y toellons kolonn an re wiryon. 19Rag agas gostytter yw aswonnys gans tus oll, bys may lowenhav warnowgh; my a vynn orthowgh bos fur dhe'n da ha gwiryon dhe'n drog. 20Ena an Duw a gres a vrew Satnas yn-dann agas treys hware. Gras agan Arloedh Yesu Krist re bo genowgh.

21Timothi ow hesoberer a'gas salus, ha Lukius ha Yason ha Sosipater, ow herens.

22My, Tertius, skrifer an lyther ma a'gas salus y'n Arloedh.

23Gayus, ost dhymmo vy ha dhe'n eglos oll, a'gas salus. Erastus, alhwedhor an sita, ha'gan broder Kwartus, a'gas salus. 24Gras agan Arloedh Yesu Krist re bo genowgh hwi oll. Amen.16:24 Nyns usi an wers ma yn re a'n dornskrifow.

Gormola Duw

25Lemmyn dhodho ev neb a yll agas krevhe herwydh ow aweyl ha pregoth Yesu Krist, herwydh diskwedhyans an kevrin a vedha gwithys taw der an oesow 26mes lemmyn yw diskudhys ha, der an skrifow profoesek, war-lergh gorhemmynn an Duw heb diwedh, rag gostytter a fydh, yw dyllys dhe'n gwlaskordhow oll: 27re bo dhe'n unn Duw fur golewder bys vykken dre Yesu Krist: Amen.