Agan Selwyans yn Yesu Krist

1Rag a-ban on justifiys dre fydh, kres a'gan beus gans Duw der agan Arloedh Yesu Krist 2ma'gan beus dredho entra dre fydh5:2 War-lergh re a'n dornskrifow nyns usi omma an geryow dre fydh. dhe'n gras may sevyn ynno ha ni a vost yn agan govenek may kevrennyn golewder Duw. 3Dres henna, ni a bost yn agan galarow, ow kodhvos galar dhe dhri perthyans, 4ha perthyans a dhre prevyans, ha prevyans a dhre govenek, 5ha ny fyll govenek dhyn, rag kerensa Duw dhe vos dinewys yn agan kolonn der an Spyrys Sans re beu res dhyn.

6Ha ni hwath heb gweres, dhe'n ewn dermyn y ferwis Krist rag an re ongrassyes. 7Praga, skant ny vynnir merwel rag den gwiryon – kyn fedhir martesen merwel rag densa. 8Mes Duw a dhiskwa y gerensa dhyn drefenn Krist dhe verwel ragon ha ni hwath peghadoryon. 9Ytho a-ban on justifiys gans y woes, dhe voy y fydhyn selwys dredho a gonnar Duw. 10Rag mars en unnverhes gans Duw, ha ni hwath eskerens, dre vernans y Vab, kemmys moy, wosa ni dhe vos unnverhes y fydhyn selwys gans y vewnans. 11Yndella ha nahen, mes ni a vost yn Duw der agan Arloedh5:11 War-lergh re a'n dornskrifow nyns usi omma an geryow agan Arloedh. Yesu Krist, may kevsyn dredho lemmyn agan unnverheans.

Adam ha Krist

12Ytho dell dheuth pegh a-bervedh y'n bys der unn den ha mernans dre begh, hag yndella mernans a lesas dhe dus oll drefenn dus oll dhe begha – 13yth esa pegh a-bervedh y'n bys kyns an lagha dhe vos, mes nyns yw reknys avel pegh pan nag eus lagha. 14Byttegyns mernans a reynyas a-dhia Adam bys yn termyn Moyses, ha war an re ynwedh nag o aga feghosow haval dhe dreuspass Adam, neb yw figur anodho ev neb a vedha ow tos.

15Mes nyns yw an ro rydh haval dhe'n kammweythres. Rag mar merwis lies dre dreuspass unn den, kemmys moy re balshas gras Duw ha'n ro rydh yn gras an unn den Yesu Krist rag lies. 16Ha nyns yw an ro rydh haval dhe siwyans pegh an unn den na. Rag an vreus owth holya unn pegh a dhug dampnya, mes an ro rydh owth holya lies pegh a dheg ewnheans. 17Mar reynya mernans dre gammwrians unn den der an unn den na, kemmys moy y hwra reynya yn bewnans an re hag a gemmer palster a'n ras ha'n ro rydh a ewnder der an unn den Yesu Krist.

18Ytho dell dhug drogober unn den dampnasyon tus oll, yndella ober gwiryon unn den a dheg ewnheans ha bewnans rag tus oll. 19Ytho dell veu lies gwrys peghadoryon dre dhiwostytter unn den, yndella dre wostytter unn den lies a vydh gwrys gwiryon. 20Mes an lagha a dheuth, rag palshe an kammweythres; mes y'n tyller may palshi pegh, gras a balshi dhe voy, 21rag may kwrella gras reynya par dell reynya pegh yn mernans, dre ewnder dhe vewnans heb diwedh dre Yesu Krist agan Arloedh.