Bewnans y'n Spyrys

1Lemmyn nyns eus dampnya rag an re usi yn Krist Yesu. 2Rag lagha Spyrys bewnans yn Krist Yesu re'th tigolmas8:2 re'th tigolmas: War-lergh re a'n dornskrifow re'm digolmas. dhiworth lagha pegh ha mernans. 3Rag an pyth a veu an lagha dialloes dh'y wul, rag hy bos gwann der an kig, Duw y honan re wrug, ow tannvon y Vab y honan yn hevelep kig a begh, dhe vos offrynn pegh, hag yndella ev a dhampnyas pegh y'n kig, 4rag may fo ordenans an lagha kowlwrys ynnon ni, eus ow kerdhes a-der war-lergh an kig mes war-lergh an Spyrys. 5Rag an re a vew war-lergh an kig a wra fors a daklow an kig, mes an re a vew war-lergh an Spyrys a wra fors a daklow an Spyrys. 6Rag brys an kig yw mernans, mes brys an Spyrys yw bewnans ha kres. 7Yndella an brys a wra fors a'n kig, yw eskarogeth erbynn Duw; nyns yw gostydh dhe lagha Duw, yn hwir ny yll bos yndella, 8ha'n re usi y'n kig ny yllons plesya Duw.

9Mes nyns esowgh y'n kig, y'n Spyrys yth esowgh, mars usi Spyrys Duw trigys ynnowgh yn hwir. Neb na'n jeves Spyrys Krist nyns yw ev dhodho. 10Mes mars usi Krist ynnowgh, kynth yw marow agas korf drefenn pegh, yn few yw agas spyrys drefenn ewnder. 11Mars usi trigys ynnowgh y Spyrys ev, neb a dhrehevis Yesu a vernans, ev neb a dhrehevis Yesu a vernans a re bewnans dh'agas korf marwel ynwedh der y Spyrys usi trigys ynnowgh.

12Yndella, hwi vreder, kendonoryon on, nyns yw dhe'n kig, dhe vewa war-lergh an kig – 13rag mar pewowgh war-lergh an kig, merwel a wrewgh; mes mar korrowgh der an Spyrys gweythresow an korf, bewa a wrewgh. 14Rag myns a hembrenkir gans Spyrys Duw mebyon Duw yth yns. 15Ny gemmersowgh spyrys a gethneth ow ledya arta dhe own, mes hwi a gemmeras spyrys adoptyans avel mebyon dredho may kriyn ‘Abba! Tas!’ 16An Spyrys y honan a dheg dustuni gans agan spyrys ni, ni dhe vos fleghes Duw, 17ha mars on ni fleghes, ytho heryon, heryon a Dhuw ha kes-heryon a Grist, mar kodhevyn ganso rag may fyn ni ynwedh kevrennek a'y wolewder.

An Golewder hag a Vydh

18My a dyb na dal galarow an termyn ma bos kehaval dhe'n golewder usi ow tos dhe vos diskwedhys dhyn. 19Rag an kreasyon a wayt gans mall an diskwedhyans a vebyon Duw. 20Rag yth esa an kreasyon yn-dann vaystri euveredh, nyns o a'y vodh mes der y vodh ev neb a'n fethas yn govenek; 21drefenn an kreasyon y honan dhe vos rydhhes dhiworth kethneth podredhes dhe rydhses golewder fleghes Duw. 22Ni a woer an kreasyon oll dhe vos ow kyni hag ow suffra paynys warbarth kepar hag yn gwelivos bys lemmyn; 23mes moy es henna, ni agan honan ynwedh, a'gan beus kynsa frut an Spyrys, ni agan honan a gyn ynnon agan honan dell wortyn gans mall adoptyans avel mebyon, daspren agan korf. 24Rag y'n govenek may feun selwys, mes govenek gwelys nyns yw govenek, rag piw a wayt an pyth a wel? 25Mes mar kwaytir an pyth na welir, gans mall y'n gwaytir.

26Ynwedh an Spyrys a'gan gweres yn agan gwannder, rag ny wodhon fatell byssyn dell dhegoedh, mes an Spyrys y honan a bys ragon8:26 ragon: War-lergh re a'n dornskrifow nyns usi omma an ger ma. gans kyni dres leverel. 27Hag ev neb usi ow hwithra kolonnow a woer an pyth usi yn brys an Spyrys, rag ev dhe bysi a-barth an syns herwydh bodh Duw.

28Ni a woer pup-tra dhe oberi war-barth rag dader rag an re a gar Duw, an re yw gelwys herwydh y borpos. 29Rag an re a ragaswonnis, ev a's ragdhestnas ynwedh dhe vos kesfurvys yn imaj y Vab, rag may fo ev an kynsa-genys yn mysk breder pals. 30Ha'n re a ragdhestnas, ev a's elwis ynwedh; ha'n re a elwis, ev a's justifias ynwedh; ha'n re a justifias, ev a's glorifias ynwedh.

Kerensa Duw

31Pandr'a leveryn dhe'n taklow ma ytho? Mars usi Duw a-barth dhyn, piw eus er agan pynn? 32Neb na sparyas y Vab y honan mes y'n ros ragon ni oll, a ny vynn ev ri dhyn pup-tra ganso? 33Piw a guhudh an re dewisys gans Duw? Duw yw hag a akwit. 34Piw a guhudh? Yesu8:34 Yesu: War-lergh re a'n dornskrifow nyns usi omma an ger ma. Krist yw, neb a verwis, yn hwir, hag a veu drehevys a'n mernans, hag usi a'n dhyghowbarth dhe Dhuw, hag a bys ragon. 35Piw a'gan diberth dhiworth kerensa Krist? A wra galar, po anken, po helghya, po esow, po noethedh, po peryll, po kledha? 36Dell yw skrifys,

‘A'th wovis jy yth on ny ledhys oll an jydh;

reknys on ni avel deves dhe'n ladhva.’

37Mes yn oll an taklow ma moy es tryghoryon on dredho ev neb a'gan kara. 38Rag surhes ov, nag ankow, na bewnans, nag eledh, na prynsipatys, na taklow eus lemmyn, na taklow a dheu, na nerthow,8:38 na taklow eus lemmyn, na taklow a dheu, na nerthow: War-lergh re a'n dornskrifow na nerthow, na taklow eus lemmyn, na taklow a dheu. 39nag ughelder, na downder, na tra arall y'n kreasyon oll, ny yll agan diberth dhiworth kerensa Duw yn Krist Yesu agan Arloedh.