Dewis Ysrael gans Duw

1Yth esov ow kewsel an gwirder yn Krist, ny wowlavarav; ow howses a dheg dustuni y'n Spyrys Sans, 2bos dhymm galar meur hag anken heb hedhi y'm kolonn. 3Rag y'm bia bodh my ow honan dhe vos milliges ha diberthys dhiworth Krist rag ow breder, ow herens a-barth an kig. 4Ysraelysi yns ha dhedha yw an adoptyans avel mebyon, an golewder, an kevambosow, ri an lagha, an servis9:4 servis: Henn yw servis an tempel. ha'n ambosow, 5dhedha yth yw an ugheldasow hag a'ga eghenn, war-lergh an kig, yw Krist usi a-ugh oll, Duw benniges bys vykken. Amen.

6Mes nyns yw par dell fallsa ger Duw. Rag nyns yns dhe Ysrael oll hag yw sevys a Ysrael. 7Ha nyns yns oll mebyon Abraham drefenn i dhe vos y henedh; mes ‘Dre Ysak yth henwir dha henedh.’ 8Homma a styr nag yw mebyon an kig neb yw mebyon Duw, mes mebyon an ambos a reknir avel henedh. 9Rag hemm yw an pyth a leveris an ambos, ‘A-dro dhe'n termyn ma y tehwelav hag y fydh mab dhe Sara.’ 10Ha ny veu yndella yn unnsel, mes ynwedh pan omdhegsa Rebeka gans unn gour, agan hendas, Ysak, 11kyn na vons hwath genys na ny wrussens naneyl da na drog, (rag may pessyo towl Duw herwydh dewisyans, a-der der oberow mes der y alow), 12dhedhi y leveris, ‘An kottha a wra servya an yowynka.’ 13Dell yw skrifys,

‘Yakob a geris

mes Esaw a gesis.’

14Pandr'a leveryn ytho? Eus kammhynseth gans Duw? Bynner re bo! 15Rag ev a lever dhe Moyses,

‘My a gemmer mersi warnodho ev may kemmerav mersi warnodho,

ha my a gemmer pita anodho ev neb may kemmerav pita anodho.’

16Ytho nyns yw drefenn bodh den na drefenn lavur den mes drefenn tregeredh Duw. 17Rag an skryptor a lever dhe Faro, ‘My re'th sevis rag an keth tra ma may tiskwetthiv dhis ow galloes ynnos ha may fo dyllys ow hanow vy y'n norvys oll.’ 18Ytho ev a gemmer mersi war geniver a blekkyo dhodho hag ev a galesha kolonn keniver a blekkyo dhodho.

Konnar Duw ha'y Dregeredh

19Ty a lever dhymm ytho, ‘Prag y krodhvol ev? Rag piw a yll sevel erbynn y vodh?’ 20Mes piw os jy, den, dhe worthybi dhe Dhuw? A lever an dra formys dh'y formyer, ‘Prag y'm gwrussys yndella?’ 21A nyns eus dhe'n gweythor-pri maystri war an pri dhe wruthyl a'n keth tamm an eyl lester rag enor ha'y gila rag disenor? 22Mes pandra mar kwrug Duw, gans bodh a dhiskwedhes y gonnar ha dyllo y alloes, perthi gans perthyans meur an lestri a gonnar gwrys gwiw rag distrui, 23ha henna may fo godhvedhys rychys y wolewder rag an lestri a dregeredh hag a ragbareusis ev rag golewder, 24bys dhyn ni neb re elwis, na veu unnsel a'n Yedhewon, mes ynwedh a'n kenedhlow? 25Dell lever ev ynwedh yn Hosea,

‘An re nag o ow fobel my a's henow ow fobel,

ha hi nag o kerys, my a's henow ow haradow.’

26‘Hag y'n keth le may feu leverys dhedha, “Nyns owgh ow fobel”,

ena i a vydh henwys mebyon an Duw bew.’

27Hag Ysay a gri yn ughel a-dro dhe Ysrael, ‘Mara pydh niver mebyon Ysrael avel tewes an mor, an remenant a vydh selwys; 28rag an Arloedh a gowlwra y vreus war an norvys, heb hokya.’ 29Ha dell dharganas Ysay,

‘Na assa Arloedh an luyow has,

y tothyen ha bos avel Sodom

ha gwrys vien haval dhe Gomorra.’

Ysrael ha'n Aweyl

30Pandr'a leveryn ytho? An kenedhlow na siwyens ewnder re gavas ewnder dre fydh; 31mes Ysrael ow siwya lagha a ewnder ny dhrehedhas dhe'n lagha. 32Praga? Drefenn na'n siwya dre fydh mes dre oberow.9:32 oberow: War-lergh re a'n dornskrifow oberow an lagha. I re drebuchyas orth an men a drebuchya, 33dell yw skrifys,

‘Ottavy ow korra yn Sion men trebuchya, ha karrek a offens

ha neb a grysso ynno, ny berth ev meth.’