Ruth a Vet gans Boaz

1Hag yth esa dhe Naomi kar hy gour, den golusek, a deylu Elimelek, Boaz y hanow. 2Hag yn-medh Ruth an venyn a Moab dhe Naomi, ‘Gas vy dhe vos, my a'th pys, a-berth y'n gwel dhe guntell gesigow an ys war-lergh nebonan may kavav gras yn y dhewlagas.’ Ha hi a leveris dhedhi, ‘Ke, ow myrgh.’ 3Hag yth eth ha kuntell gesigow y'n gwel war-lergh an vysoryon, ha par happ perghennek an rann na a'n gwel o Boaz, a deylu Elimelek. 4Hag otta, y teuth Boaz a-dhiworth Bethlehem, ha leverel dhe'n vysoryon, ‘An Arloedh genowgh’, hag yn-medhons i dhodho, ‘Re'th vennikko an Arloedh.’ 5Ha Boaz a wovynnas orth an gwas o settys war an vysoryon, ‘Piw dhodho yth yw an voren ma?’ 6Ha'n gwas o settys war an vysoryon a worthybis, ‘Benyn yowynk a Moab yw hi, neb re dhehwelis gans Naomi a ranndir Moab, 7Ha hi a wovynnas, “Gas vy dhe guntell gesigow, my a'th pys, yn mysk an manalow a-dryv an vysoryon.” Ytho hi a dheuth hag oberi a-dhia'n myttin bys y'n eur ma, marnas hi a esedhas pols y'n chi.’2:7 marnas hi a esedhas pols y'n chi: An Ebrow yw ankler. War-lergh an Septuagint ha ny bowesas hwath pols byghan y'n gwel.

8Hag yn-medh Boaz dhe Ruth, ‘A ny wruss'ta klewes, ow myrgh? Na ge dhe guntell gesigow yn ken gwel, ha na dremen alemma, mes glen ogas orth ow maghtethyon. 9Gwra attendya an gwel a wrons i mysi, ha mos war aga lergh. A ny wrugavy gorhemmynna dhe'n wesyon na wrellons dha dochya, ha pan vo syghes dhis, ena ty a yll mos dhe'n lestri hag eva a'n dowr a wra an wesyon tenna.’ 10Ha hi a goedhas war hy fas hag omblegya dhe'n dor, ha leverel dhodho, ‘Prag y kevis vy gras y'th tewlagas, ty dhe'm aswonn, ha my estren?’ 11Ha Boaz a worthybis ha leverel dhedhi, ‘Y feu leverys dhymm oll yn tien pup-tra re wruss'ta gul gans dha hweger, wosa mernans dha wour, ha ty a asas dha das ha'th vamm, ha pow dha enesigeth ha dos a-berth yn pobel na aswonnsys kyns. 12Re wrello an Arloedh attyli dha ober, ha kowal re bo dha bewas dhiworth an Arloedh, Duw Ysrael, may hwrussys dos yn-dann y eskelli dhe gavoes skovva.’ 13Hag yn-medh hi, ‘Gas vy dhe gavoes gras y'th tewlagas, ow arloedh, drefenn ty dhe'm konfortya, ha drefenn ty dhe gewsel orth kolonn dha vaghteth – ha my, nyns ov vy kepar hag onan a'th vaghtethyon.’

14Hag yn-medh Boaz dhedhi, ‘Dhe brys li, deus omma yn ogas, ha deber a'n bara ha trogh dha rann anodho y'n aysel.’ Ytho hi a esedhas ryb an vysoryon, hag ev a ros dhedhi ys rostys, ha hi a dhybris ha gwalghys o, ha hi a asas an remenant. 15Ha hi a sevis dhe guntell gesigow ha Boaz a worhemmynnis orth y wesyon, ow leverel, ‘Hwath yn mysk an manalow gesewgh hi dhe guntell gesigow, ha na wrewgh hy ankombra, 16Hag ynwedh gesewgh re a'n dornasow dhe goedha rygdhi, may hallo hi aga huntell, ha na wrewgh hy repreva.’

17Ha hi a guntellas gesigow y'n gwel bys y'n gorthugher, ha drushya an myns re wrussa hi y guntell, hag y feu a-dro dhe efa heydh. 18Ha hi a wrug y dhoen dhe'n dre, ha'y hweger a welas kemmys re wrussa hi guntell. Ena Ruth a gemmeris yn-mes hag a ros dhedhi an ys rostys a veu gesys dhedhi, may hwrussa kavoes hy gwalgh anodho. 19Yn-medh hy hweger dhedhi, ‘Ple hwruss'ta kuntell gesigow hedhyw? Ple hwruss'ta oberi? Re bo benniges neb a'th attendyas.’ Ha hi a dherivas orth hy hweger hanow an gour a wrug hi oberi ganso, ow leverel, ‘Hanow an gour a wrug vy oberi ganso yw Boaz.’ 20Hag yn-medh Naomi dh'y gohydh, ‘Bennigys re bo ev gans an Arloedh na forsakyas y dregeredh troha'n re vew ha'n re varow.’ Ha Naomi a leveris dhedhi, ‘An gour ma yw neskar dhyn, onan a'gan dasprenysi ywa.’ 21Hag yn-medh Ruth, an venyn a Moab, ‘Yn sur ev a leveris dhymm, “Y koedh dhis glena ogas dhe'm gwesyon bys may hwrellons i gorfenna kuntell oll an drevas yw dhymm.” ’ 22Ena yn-medh Naomi dh'y gohydh Ruth, ‘Da yw, ow myrgh, ty dhe vos yn-mes gans y vaghtethyon, yn le bos anniys yn gwel arall.’ 23Ha hi a lenas ogas dhe vaghtethyon Boaz dhe guntell gesigow gansa bys kowlwrians trevas an heydh ha trevas an gwaneth, hag a-wosa yth esa hi trigys gans hy hweger.