Ruth ha Boaz orth an Leur-drushya

1Hag yn-medh Naomi hy hweger dhedhi, ‘Ow myrgh, a ny hwilav ragos powes, may fo da genes? 2Lemmyn, Boaz, mayth eses owth oberi gans y vaghtethyon, a nyns yw ev agan neskar? Otta, haneth yn nos yma ev ow kwynsella heydh dhe'n leur-drushya. 3Ytho gwra omwolghi, hag omuntya hag omwiska, ha ke yn-nans dhe'n leur-drushya. Mes gwayt na as dhe'n gour godhvos dha vos ena bys pan worfenno ev dybri hag eva. 4Pan wrowedh ev dhe goska, merk an tyller may hwrowedh. Ena ke, gwra diskudha y dreys ha growedha rybdho. Ev a wra derivas dhis an pyth a dhegoedh dhis y wul.’ 5Ruth a worthybis dhedhi, ‘Pup-tra a leversys dhymm y wul, henna a wrav.’

6Ytho hi eth yn-nans dhe'n leur-drushya ha gul pup-tra par dell wrussa hy hweger gorhemmynna dhedhi y wul. 7Pan worfennsa Boaz dybri hag eva, ha lowen y golonn, ev eth dhe wrowedha dhe benn an bern greun. Ena Ruth a gramyas yn kosel ha diskudha y dreys ha growedha rybdho. 8Ha dell hwarva, yn kres an nos, an gour dhe grena ha treylya hag otta, yth esa benyn ow krowedha ryb y dreys. 9Hag yn-medh ev, ‘Piw osta?’ Ha hi a worthybis dhodho, ‘Ruth ov vy, dha vaghteth. Gwra lesa dha lostenn dres dha vaghteth, rag dha vos agan neskar.’ 10Hag yn-medh ev, ‘Bennigys osta gans an Arloedh, ow myrgh, moy yw dha guvder y'n diwedh es y'n dalleth. Rag ny wruss'ta mos war-lergh an wer yowynk, po boghosek po rych. 11Ha lemmyn, ow myrgh, na borth own, my a vynn gul ragos pup-tra re leversys, drefenn oll ow fobel y'n dre3:11 oll ow fobel y'n dre: Ebrow oll an yet a'm pobel. a woer dha vos benyn leun a vertu. 12Lemmyn, gwir yw ow bos neskar, mes yma neskar arall neb yw kar nes es dell ov vy. 13Gorta omma haneth, ena ternos vyttin; ytho, mar fynn ev dha dhemmedhi, yndella re bo, ha mar ny vynn ev gul yndella, ena my a vynn dha dhemmedhi, mar sur dell vew an Arloedh. Kosk omma bys vyttin.’

14Ha hy a wrowedhas ryb y dreys bys vora, ha sevel kyns den dhe alloes aswonn den arall. Yn-medh ev dhedhi, ‘Bynner re bo ev konvedhys bos benyn omma y'n leur-drushya.’ 15Ena ev a leveris, ‘Doro an warrlenn usi warnas, ha sett dalghenn ynni’, ha hi a's synsis fast hag ev a vusuras hwegh musur a heydh ha'y worra war hy diwskoedh. Ena ev3:15ev: War-lergh re a'n dornskrifow, ha'n Syriek ha'n Vulgat: hi. eth dhe'n dre. 16Ha hi a dhehwelis dh'y hweger, neb a wovynnas, ‘Fatell wruss'ta spedya, ow myrgh?’ Ha hi a dherivas dhedhi pup-tra re wrussa an gour rygdhi. 17Hag yn-medh hi, ‘Ev re ros dhymm an hwegh musur ma a heydh, rag ev a leveris dhymm, “Na ge dhe'th hweger gwag dha dhiwla.” ’ 18Ena yn-medh Naomi, ‘Gorta omma, ow myrgh, erna wodhvi fatell goedh an mater ma, rag ny wra an gour powes marnas ev a wra ervira an mater hedhyw.’