Demmedhyans Boaz ha Ruth

1Boaz eth yn-bann dhe'n yet hag esedha ena, hag otta, yth esa an neskar ow tremena, may hwrussa Boaz kewsel anodho, hag yn-medh Boaz, ‘Deus omma hag esedh omma, ty gothman’, hag ev a dreylyas a-denewen hag esedha. 2Ena Boaz a elwis deg gwer a henavogyon an sita ha leverel, ‘Gwrewgh esedha omma’, hag i a esedhas. 3Hag yn-medh Boaz dhe'n neskar, ‘Naomi, neb yw dehwelys dhiworth tiredh Moab, a vynn gwertha rann an tir esa dh'agan kar Elimelek. 4Ytho, yn-medhav, my a wra derivas dhis, ow leverel, gwra y brena a-rag an dus usi owth esedha omma hag a-rag henavogyon ow fobel. Mar mynnydh y dhasprena, yndella re bo, ha mar ny vynn'ta y wul, deriv e dhymm, may hwodhviv. Ty yw an kynsa a yll y dhasprena, ha my yw an nessa wosa ty.’ Ev a worthybis, ‘Y dhasprena a wrav.’ 5Ena yn-medh Boaz, ‘Pan brenydh an tir dhiworth Naomi, res vydh dhis ynwedh kavoes Ruth an venyn a Moab, gwreg agan kar marow, dhe dhrehevel hanow an den marow war y eretons.’ 6Yn-medh an neskar, ‘Ny allav vy y dhasprena ragov vy ow honan, ma na dhistruiv ow eretons vy. Gwra y dhasprena dha honan, drefenn na allav vy y dhasprena.’

7Ha hemm o an us yn Ysrael y'n termyn eus passyes, rag kowlwul oll an negys a dhasprena neppyth po y geschanjya; y hwre gour diwiska y sandal ha'y ri dhe'n den arall. Henn o an fordh dhe fastya bargen yn Ysrael. 8Ytho an neskar a leveris dhe Boaz, ‘Gwra y brena ragos jy dha honan’, hag ev a dhiwiskas y sandal. 9Ena yn-medh Boaz dhe'n henavogyon hag oll dhe'n bobel, ‘Dustunioryon owgh hwi hedhyw my dhe brena dhiworth Naomi pup-tra a bewo Elimelek, Kilyon ha Mahlon, 10hag ynwedh my a gemmeras Ruth an Moabyades, gwreg Mahlon, yn gwreg dhymm, rag drehevel hanow an den marow war y eretons, ha ma na vo hanow an den marow kellys yn mysk y vreder nag a yet y dyller ev. Hwi yw dustunioryon hedhyw.’ 11Hag oll an bobel esa y'n yet, ha'n henavogyon, a worthybis, ‘Dustunioryon on ni. Re wrello an Arloedh dhe'n venyn usi ow tos a-berth y'th chi bos kepar ha Raghel ha Lea, neb aga diw a dhrehevis chi Ysrael, ha re sewenni yn Efratha ha dos ha bos den a vri yn Bethlehem. 12Re dheffo ha bos dha ji kepar ha chi Peres, a wrug Tamar dineythi dhe Yuda, der an has a wra Duw ri dhiso dhiworth an voren ma.’

Aghskrif Davydh

13Ha Boaz a gemmeras Ruth, ha hi a dheuth ha bos y wreg, hag ev a dheuth dhedhi, ha Duw a wrug dhedhi omdhoen, ha hi a dhineythis mab. 14Hag yn-medh an benynes dhe Naomi, ‘Benniges re bo an Arloedh, na wrug dha asa heb neskar hedhyw. Re bo aswonnys4:14 aswonnys: Ebrow gelwys. y hanow yn Ysrael. 15Ev a wra dhe'th enev dasvewa, ha dha sostena y'th kothni, drefenn dha wohydh neb a'th kar dhe wul y dhineythi. Gwell yw hi ragos ages seyth mab.’ 16Ha Naomi a gemmeras an mab ha'y worra yn hy barrlenn, ha dos ha bos y vagores. 17An kentrevogesow a'n henwis, ow leverel, ‘Mab a veu genys dhe Naomi’, hag i a'n henwis Obed. Ev a dheuth ha bos tas Yesse, o tas Davydh. 18Ha hemm yw linyeth Peres: Peres a dhineythis Hesron, 19ha Hesron a dhineythis Ram,4:19 Ram: War-lergh an Vulgat ha re a dhornskrifow an Septuagint Aram. hag Ram a dhineythis Amminadab, 20hag Amminadab a dhineythis Nahshon, ha Nahshon a dhineythis Salmon, 21ha Salmon a dhineythis Boaz, ha Boaz a dhineythis Obed, 22hag Obed a dhineythis Yesse, ha Yesse a dhineythis Davydh.