Teylu Elimelek A dhe Moab

1Ha dell hwarva yn dydhyow rewl an vreusysi, yth esa divoetter y'n tir, ha gour a Bethlehem-yuda eth dhe wodriga yn tiredh Moab, ev ha'y wreg ha'y dhew vab. 2Hanow an gour o Elimelek, ha hanow y wreg o Naomi, ha'y dhew vab o Mahlon ha Kilyon, a deylu Efratha yn Bethlehem-yuda; hag i a dheuth yn tiredh Moab ha gortos ena. 3Hag Elimelek gour Naomi a verwis, ha gesys o hi, ha'y dew vab gensi. 4Ha'n vebyon a dhemmedhis benynes a Moab; hanow an eyl o Orpa ha hanow hy ben o Ruth, hag yth esens trigys ena a-dro dhe dheg blydhen. 5Ha Mahlon ha Kilyon, aga dew, a verwis ynwedh, hag omdhivesys o an venyn a'y mebyon ha'y gour.

Naomi ha'y Gohydhow

6Ha hi a sevis ha dehweles a diredh Moab, ha'y gohydhow gensi, drefenn hi dhe glewes yn tiredh Moab an Arloedh dhe wul vri a'y bobel, ow ri dhedha bara. 7Ha hi a asas an tyller mayth esa hi, ha'y diw wohydh gensi, ha mos dhe dhehweles dhe bow Yuda. 8Hag yn-medh Naomi dh'y diw wohydh, ‘Kewgh, dehwelewgh pubonan dhe ji hy mamm. Re wrello an Arloedh diskwedhes tregeredh dhywgh kepar dell wrussowgh hwi dhe'n re varow ha dhymmo vy. 9Re rollo an Arloedh dhywgh may kyffowgh powes, pubonan yn chi hy gour.’ Ena hi a ammas dhedha, hag i a wrug oela dagrow, ughel aga lev. 10Hag yn-medhons i dhedhi, ‘Yn sur ni a vynn dehweles genes dhe'th pobel jy.’ 11Hag yn-medh Naomi, ‘Treylyewgh, ow myrghes, prag y fynnowgh mos genev? Eus mebyon dhymm y'm torr may fens i gwer dhywgh hwi? 12Treylyewgh, ow myrghes, kewgh, rag re goth ov vy dhe gavoes gour. Mar lavarren bos govenek dhymm yndella, ha bos gans gour haneth, ha dineythi mebyon, 13a wrussewgh hwi aga gortos bys pan vons i tevesik? A wrussewgh hwi agas omwitha a-ji, heb kavoes gour? Na, ow myrghes, rag pur hwerow yw dhymm a-barth dhywgh, bos leuv an Arloedh ystynnys er ow fynn.’ 14Mes i a dhrehevis yn-bann aga lev, hag oela dagrow a-nowydh, hag Orpa a ammas dh'y hweger, mes Ruth a's byrlas yn tynn.

15Hag yn-medh Naomi, ‘Otta, dha hwoer dre lagha re wrug dehweles dh'y fobel hi, ha dh'y dhuwow: ty gwra dehweles ynwedh war hy lergh.’ 16Hag yn-medh Ruth,

‘Na bled genev dha asa,

dhe dreylya dhiworth dha lergh,

rag plepynag yth ylli, yth av;

ha plepynag yth osti, yth ostyav;

dha bobel a vydh ow fobel

ha dha Dhuw a vydh ow Duw.

17Plepynag y ferwi y farwav,

hag ena y fydhav ynkleudhys;

hemma re wrello an Arloedh dhymm

ha moy yn ta,

mar kwra travyth saw ankow y honan gul dibarth yntra ty ha my.’

18Ha hi a welas hy bos ervirys dhe vos gensi, ha hi a astelas kewsel orti.

19Ytho i eth yn-rag aga diw bys pan dheuthons dhe Bethlehem. Ha pan ens devedhys dhe Bethlehem, oll an sita o yn tervans a-dro dhedha, hag yn-medhons, ‘Yw hemma Naomi?’ 20Hag yn-medh hi dhedha,

‘Na'm gelwewgh Naomi,1:20 Naomi: Henn yw dhe styrya Plesour.

gelwewgh vy Mara,1:20 Mara: Henn yw dhe styrya Hwerow.

rag an Ollgalloesek1:20 an Ollgalloesek: Ebrow Shadday. re'm dyghtyas yn pur hwerow.

21My eth dhe-ves leun,

ha gwag re wrug an Arloedh ow daskorr;

prag y'm gelwewgh Naomi,

ha Duw re dhustunias er ow fynn

ha'n Ollgalloesek re wrug drog dhymm?’

22Ytho Naomi a dhehwelis, ha gensi Ruth an venyn a Moab, hy gohydh, neb a dhehwelis dhiworth powdir Moab; ha dos yn Bethlehem a wrussons yn dalleth trevas an heydh.