RAGLAVAR

Gans Mab-wynn an Awtour

Taklow pals ha bras re beu delivrys dhyn der an lagha ha'n brofoesi ha'n re erell neb a's holyas; rakhenna ni a dal gormel Ysrael rag dyskans ha furneth. Hag a-ban yw res dhe'n re a red kavoes konvedhes, res yw ynwedh dhe'n re a gar dyskans bos heweres orth an re usi trigys yn broyow erell, dre gewsel ha dre skrifa.

Ytho ow thas-gwynn Yesus, wosa kowal omri dhe redyans an lagha ha'n brofoesi ha lyvrow erell agan tasow, ha wosa kavoes meur a skians ynna, ev ynwedh o hembrenkys dhe skrifa neppyth a-dro dhe dhyskans ha furneth, rag may hwrella an re a gar dyski, owth aswonn an taklow ma ynwedh, spedya hwath moy ow pewa herwydh an lagha.

Ynniys owgh hwi, rakhenna, dhe redya an lyver ma gans bodh da ha gans attendyans, ha dhe vos hel pan wryllyn ni, yn spit dhe ober diwysyk yn treylyans, fyllel derivas neppyth yn perfydh. Rag an pyth hag a veu derivys y'n dalleth yn Ebrow, nyns yw dhodho poran an keth styr wosa treylyans yn yeth arall. Nyns yw boghes an dyffrans y'n ober ma yn unnsel, mes hwath y'n Lagha y honan, ha'n Brofoesi, ha'n lyvrow erell, dhiworth an pyth a veu leverys yn aga yeth aga honan.

Pan dheuth vy dhe Ejyp y'n etegves blydhen warn ugens a reyn Ewergetes ha triga ena neb termyn, my a gavas chons a vyns a dhyskans. Res o dhymm porres, dell heveli, spena diwysygneth ha lavur ow treylya an lyver ma. Y'n spys na, my a gollas meur a gosk ha dri meur a skentoleth rag kowlwul ha dyllo an lyver rag an re a drig yn broyow erell, ha neb a vynn pursiwya dyskans, neb yw parys, herwydh aga us, dhe vewa herwydh an lagha.

Gormola Furneth

1Pub furneth oll a dheu a-dhiworth an Arloedh,

ha ganso yma bys vykken.

2Tewes an mor, bannaghow an glaw,

ha dydhyow a drank heb worfenn, piw a yll aga nivera?

3Ughelder nev ha les an norvys,

ha'n islonk ha furneth – piw a yll aga helerghi?

4Kyns pup-tra y feu furneth kreatys,

ha konvedhes doeth a drank heb worfenn.

5Ger Duw y'n ughelder yw fenten furneth;

ha'y fordhow yw gorhemmynnow bythkwethek.

6Gwreydhenn furneth – dhe biw re beu hi diskudhys?

Hy devisys skentel – piw a's goer?

7Dhe biw re beu godhvos furneth diskwedhys,

ha piw re gonvedhas hy frevyans meur?1:7 Nyns usi an wers ma yn re a'n dornskrifow.

8Yma onan yw fur, ha dhe vos ownys yn feur,

owth esedha war y se.

9An Arloedh y honan a's kreatyas,

ev a's gwelas ha'y musura,

ha'y diveri war y oberow oll.

10Dhe oll kig yma kevrenn anedhi, herwydh y ro,

hag ev a's ros yn hel dhe'n re a'n kar.

Own an Arloedh yw Gwir Furneth

11Own an Arloedh a dhre enor ha goeth,

ha heudhder ha kurun a lowena.

12Own an Arloedh a lowenha an golonn,

ha ri joy ha lowena, ha bewnans hir.

13Neb a berth own a'n Arloedh, da vydh y rann y'n diwedh;

hag yn dydh y vernans ev a vydh benniges.

14Own an Arloedh yw an dalleth a furneth:

ha war-barth gans an re len hi a veu kreatys y'n dorr.

15Hi a settyas hy neyth yn mysk tus, selven bythkwethek,

ha hi a vydh len dha'ga has.

16Own an Arloedh yw lanwes a furneth,

ha hi a's medhow gans hy frut.

17Hi a lenow aga chi oll gans taklow plegadow,

ha'ga gwithvaow gans hy askorr.

18Own an Arloedh yw kurun furneth,

ow kul dhe gres ha yeghes perfydh bleujyowa.

19Ev a's gwelas ha'y nivera,

hag ev a dhiveris skentoleth ha godhvos a gonvedhes avel glaw,

hag ughelhe glori an re a wra hy synsi fast.

20Own an Arloedh yw an wreydhenn a furneth,

ha'y skorr yw bewnans hir.

21Own an Arloedh a jas peghosow dhe-ves;

hag y'n tyller mayth usi, ev a dreyl sorr dhe-ves.1:21 Nyns usi an wers ma yn re a'n dornskrifow.

22Ny yll sorr anewn bos justifiys,

rag sorr den a boes an vantol dh'y dhiswrians.

23Den leun a berthyans a bes kosel bys y'n pols ewn,

hag a-wosa joy a dardh yn-mes dhodho.

24Ev a gudh y eryow bys y'n pols ewn,

ha gweusyow tus pals a dheriv a-dro dh'y skians da.

25Y'n tresorvaow a furneth yma lavarow fur,

mes own a Dhuw yw pyth kasadow dhe beghador.

26Mar hwensydh furneth, gwith an gorhemmynnow,

ha'n Arloedh a's re dhis yn hel.

27Own an Arloedh yw furneth ha dyskybleth,

hag ev a gyv delit yn lelder hag uvelder.

28Na vydh diwostydh dhe own an Arloedh,

na dos nes dhodho gans kolonn dhewblek.

29Na vydh falswas yn golok tus,

ha goelya dha dhiwweus.

30Na ughelha dha honan, rag own ty dhe omdhisevel

hag yndella dri disenor warnas dha honan.

An Arloedh a dhiskudh dha gevrinyow

ha'th tewlel dhe'n dor yn kres an kuntelles,

drefenn na dheuthys yn own an Arloedh,

ha dha golonn o leun a doell.