1Rewler fur a dhysk y bobel,

ha rewl den a gonvedhes yw ordenys yn ta.

2Kepar ha rewler an bobel, yndella yw y soedhogyon;

ha kepar ha ledyer an sita, yndella yw oll hy annedhysi.

3Myghtern heb dyskybleth a dhistru y bobel,

mes sita a dyv dre gonvedhes hy rewloryon.

4Yma governans an norvys yn diwla an Arloedh,

ha warnodho ev a dhrehav nebonan 'vas rag an termyn.

5Yma sewena gour yn diwla an Arloedh,

hag ev a sett y enor war fas skriba an lagha.

An Peghes a Woeth

6Na vydh serrys orth dha gentrevek rag pub pystik,

ha na wra travyth dre weythresow a donteth.

7Goeth yw kasadow a-rag an Arloedh hag a-rag tus,

ha kammhynseth yw divlas gans an dhew.

8Myghternsys a dremen dhiworth kenedhel dhe genedhel

drefenn kammhynseth ha goeth ha kevoeth.10:8 War-lergh re a'n dornskrifow yma omma Nyns eus travyth gweth es den a gar mona, rag den a'n par na a ombrof rag gwerth.

9Fatell yll den a dhoust ha lusu bos goethus?

Rag hwath yn termyn bewnans y golodhyon a beder.

10Kleves hir a ankomber an medhek;

myghtern an jydh hedhyw a verow a-vorow.

11Rag pan wra den merwel

ev a erit kramviles, ha goedhviles, ha pryves.

12Dalleth goeth den yw omdenna dhiworth an Arloedh;

pan forsak an golonn hy Gwrier.

13Rag dalleth goeth yw peghes,

ha neb a len orto a dhinew taklow kasadow avel glaw.

Rakhenna an Arloedh re dhros warnedha galarow dres eghenn,

ha'ga distrui yn tien.

14An Arloedh re dewlis dhe'n dor tronys rewloryon,

hag ev re wrug dhe'n re uvel esedha yn aga le.

15An Arloedh re dennas yn-bann gwreydh an kenedhlow,

hag ev re blansas an re isel yn aga le.

16An Arloedh re dhomhwelis tiryow an kenedhlow,

hag ev re's distruis bys yn selyow an norvys.

17Ev re dennas re anedha dhe-ves ha'ga distrui,

hag ev re dhefendyas kov anedha dhiworth an norvys.

18Ny veu goeth kreatys rag tus,

na sorr fers rag an re genys a venynes.

Tus yw Wordhi dhe Gavoes Enor

19Py agh yw wordhi dhe gavoes enor?

Agh mab-den.

Py agh yw wordhi dhe gavoes enor?

An re a berth own a'n Arloedh.

Py agh yw anwiw dhe gavoes enor?

Agh mab-den.

Py agh yw anwiw dha gavoes enor?

An re a gammdremen erbynn an gorhemmynnow.

20Yn mysk breder aga hembrenkyas yw wordhi dhe gavoes enor,

ha'n re a berth own a'n Arloedh yw wordhi dhe gavoes enor a-dheragdho.

21Own an Arloedh yw dalleth kemmeradewder;

mes gorthter ha balghder yw dalleth skonyans.10:21 Nyns usi an wers ma yn brassa rann an dornskrifow.

22An den rych, an den kevoethek ha'n den boghosek –

aga bostyans yw own an Arloedh.

23Nyns yw ewn dispresya den boghosek ha poellek,

na nyns yw gwiw enora gour a beghes.

24An ughelor, ha'n breusyas, ha'n rewler a vydh enorys,

mes nyns yw onan anedha brassa es den a berth own a'n Arloedh.

25Tus rydh a serv gwas fur,

ha ny wra den a gonvedhes krodhvolas.

26Na wra displetyans a'th furneth pan wredh dha ober,

ha na vost yn termyn may fo esow dhis.

27Gwell yw an den neb a ober ha dhodho palster a bup-tra,

ages den a gerdh a-dro ow bostya, mes ow fyllel a vara.

28Ow mab, gordh dha honan gans klorder,

ha ro dhiso jy enor herwydh dha vri.

29Piw a justifi an den a begh er y bynn y honan?

Ha piw a enor an den a dhisenor y vewnans y honan?

30Enorys yw den boghosek rag y wodhvos,

hag enorys yw den rych rag y gevoeth.

31Den enorys yn boghosogneth – kemmys moy yn kevoeth!

Ha den disenorys yn kevoeth – kemmys moy yn boghosogneth!