Semlansow a Doell

1Furneth den uvel a dhrehav y benn,

ha gul dhodho esedha yn mysk an vrasyon.

2Na wormel gour rag y fisment da,

ha na gas den rag y semlans.

3Byghan yw gwenenenn yn mysk kreaturs a nij,

mes hy askorr yw an gwella a daklow hweg.

4Na vost a-dro dhe wiska dillas teg,

ha na ughelha dha honan y'n jydh mayth os enorys;

rag gweythresow an Arloedh yw barthusek,

ha'y weythresow yw kudhys dhiworth tus.

5Re beu res dhe lies myghtern esedha war an leur,

mes onan nag o tybys anodho re wiskas diadem.

6Meur a rewloryon re beu disenorys yn feur,

ha tus vryntin re beu daskorrys yn diwla tus erell.

7Na arvreus kyns ty dhe hwithra;

yn kynsa preder, hag ena reprev.

8Na worthyp kyns ty dhe glewes,

ha na wodorr den hag ev ow kewsel.

9Na dhadhel a-dro dhe vater na'th teur anodho,

ha na esedh gans peghadoryon hag i ow preusi ken.

10Ow mab, na omgemmer negysyow pals;

mar kwreta aga kressya ny vydhydh divlam.

Mars edh yn-rag ny yllydh passya,

hag ow fia dhe'n fo ny dhienkydh.

11Yma den a lavur, hag a striv hag a fisten,

mes kemmys moy y esow.

12Yma den arall yw lent ha dhodho edhomm a weres,

neb a fyll a nerth hag yw pur voghosek,

mes dewlagas an Arloedh a'n hwila dh'y les;

ev a'n drehav yn-mes a'y dyller isel

13ha drehevel y benn;

ha lies a's teva marth anodho.

14Taklow da ha drog, bewnans hag ankow,

boghosogneth ha rychys, a dheu dhiworth an Arloedh.

15Furneth, skians ha konvedhes a'n lagha a dheu dhiworth an Arloedh;

kerensa ha'n fordh a oberow da a dheu dhiworto.

16Toell ha tewlder a veu kreatys war-barth gans peghadoryon:

ha drog a gothha gans an re yw balgh anodho.11:16 Nyns eus gwersow 15 ha 16 yn re a dhornskrifow an Septuagint; ymons y'n Ebrow.

17Ro an Arloedh a dhur rag an re yw dhuwek,

ha'y favour a dhre sewena bys vykken.

18Yma den yw rych der y dhiwysygneth ha'y grefni,

ha hemm yw an gober res dhodho:

19pan lever ev, ‘My re gavas powes,

ha lemmyn my a dheber a'm taklow da!’

ny woer ev pygemmys termyn a dremen

kyns ev dh'aga gasa dhe dus erell, ha merwel.

20Sav y'th gevambos ha'y attendya,

ha kothha y'th ober.

21Na borth marth orth gweythresow peghador,

mes trest y'n Arloedh ha bes gans dha hwel,

rag es yw yn golok an Arloedh

gul den boghosek rych, snell ha distowgh.

22Bennath an Arloedh yw gober an den duwek,

hag yn unn pols byghan Duw a wra dh'y vennath bleujyowa.

23Na lavar, ‘Pandra eus edhomm dhymm anodho,

ha pana sewena a vydh dhymm yn termyn a dheu?’

24Na lavar, ‘Yma lowr dhymm,

ha pana dra a yll hwarvos dhymm yn termyn a dheu?’

25Y'n jydh a sewena, ankevys yw droglamm,

hag yn jydh a dhroglamm, nyns yw sewena kovhes.

26Rag es yw yn golok an Arloedh yn dydh mernans

gobra den herwydh y fara.

27Anken unn our a wra dhe dhen ankevi delit,

hag yn diwedh bewnans den y fydh y weythresow diskudhys.

28Na alw denvyth lowen kyns ev dhe verwel;

aswonnys vydh gour der y fleghes.

29Na dhoro pub den a-berth y'th chi,

rag pals yw antylli an toeller.

30Kepar ha grugyar-dhynya yn kowell, yndella yw brys den goethus,

ha kepar hag aspier ev a attend dha goedhva;

31rag ev a gontrewayt, ow treylya dader dhe dhrog,

ha dhe weythresow wordhi ev a re blam.

32Dhiworth gwryghonenn a dan y teu regydh pals,

ha peghador a gontrewayt rag skoellya goes.

33Bydh war a sherewa, rag ev a dhevis drog,

ma na rollo ev dhis namm a dhur.

34Degemmer estren a-berth y'th chi, hag ev a'th tistemper gans trobel,

hag ev a'th estrenha dhiworth dha deylu dha honan.