1Mar kwredh gweythres da, godhvydh dhe biw y'n gwredh,

ha tus a woer gras dhis rag dha weythresow da.

2Gwra dader dhe dhen duwek ha ty a vydh attylys –

ha kyn na vo henna ganso ev, yn sur y fydh gans an Ughella.

3Ny dheu dader vyth dhe'n den a bes yn droktra,

na dhe'n den na re alusenow.

4Ro dhe'n den duwek, mes na weres an peghador.

5Gwra dader dhe dhen uvel, mes na ro dhe dhen didhuw;

lest e rag kavoes y vara, ha na'n ro dhodho,

rag own ev dhe'th fetha ganso;

rag ty a gemmer diwweyth kemmys ha'n droktra

avel talas rag oll an dader a wredh dhodho.

6Rag an Ughella y honan a gas peghadoryon

hag ev a dal dial war dus dhidhuw.

7Ro dhe'n den da, mes na weres an peghador.

8Ny vydh kar aswonnys yn sewena,

ha ny vydh eskar kudhys yn droglamm.

9Hegar yw eskerens gour pan yw sewen,

mes pan eus droglamm warnodho, y tiberth y gar anodho hogen.

10Nevra na drest dhe'th eskar,

rag kepar dell wra kober gosseni, yndella yth yw y dhroktra.

11Kyn hwrello ev omuvelhe ha mos a-dro plegys dhe'n dor,

kemmer with, ha bydh war anodho.

Bydh dhodho kepar ha nebonan re wrug dhe weder-mires splanna,

dhe surhe, na vydh gossenek yn tien.

12Na'n gorr dhe sevel rybos,

ma na'th tomhwello ha kemmeres dha le;

na'n gorr dhe esedha dhe'th leuv dhyghow,

ma na assayo kemmeres dha esedh,

ha wostiwedh ty a aswonn gwiryonedh ow geryow,

ha bos gwenys gans an pyth a leveris vy.

13Piw a gemmer truedh a soener pan yw brethys gans sarf,

po a nebonan neb a dheu nes dhe woedhviles?

14Yndella ny wra denvyth kemmeres truedh a dhen a goweth gans peghador,

ha neb a gemmer rann yn y beghosow.

15Ev a worta genes pols,

mes mar fyll dha fortun, ny worta genes pella.

16Eskar a gews yn hweg gans y dhiwweus,

mes yn y golonn ev a dewl towl dhe'th tewlel yn pytt;

eskar a oel gans y dhewlagas,

mes mar kyv ev chons ny'n jevydh nevra lowr a'th woes.

17Mar teu droglamm warnas, ty a'n gyv ena yn kynsa;

owth omwul dha weres, ev a wra dhe'th seudhel trebuchya.

18Ev a shak y benn, ha takya y dhiwla,

ha hwystra lower, ha chanjya semlans y fas.