1Gwynnvys an gour na slynkyas gans y dhiwweus

ha na veu gwenys gans poen y beghosow.

2Gwynnvys an den nag yw dampnys gans y golonn y honan,

ha na gollas y wovenek.

Devnydhya Rychys gans Doethter

3Ny dhelledh rychys dhe wour pith,

ha dhe dhen kraf, py les yw pythow?

4Piwpynag a guntello dre gemmeres dhiworto y honan, a guntell rag re erell,

ha re erell a vew yn palster war y bythow.

5Mars yw den kraf dhodho y honan, dhe biw y fydh ev hel?

Ny gemmer plesour yn y bythow y honan.

6Nyns yw denvyth kraffa ages an den yw pith dhodho y honan,

ha hemm yw an kessydhyans rag y grefni.

7Mar kwra ev dader, dre wall y'n gwra,

ha gordhiwedh ev a dhiskudh y vilta.

8Drog yw an den ha dhodho lagas kraf;

ev a dreyl y fas dhe-ves heb aswonn tus.

9Nyns yw lagas den kraf pes da gans y rann,

ha drog anewnder a wra dhe'n enev gwedhra.

10Lagas pith a skon bara,

hag yma fowt anodho war y voes.

11Ow mab, dyght dha honan yn ta, herwydh dha bygans,

ha ri offrynnow gwiw dhe'n Arloedh.

12Porth kov, na dhelat ankow;

ha ny veu diskwedhys dhis ordenans ifarn.

13Kyns merwel, gwra dader dhe gar;

ystynn dha leuv, ha ro dhodho kemmys dell ylli.

14Na skon dydh lowen dhiso jy dha honan;

ha na gyll dha rann a blesour.

15A ny wredh gasa frut dha lavur dhe dhen arall,

ha'n pyth a gevsys gans gonis dhe vos rynnys dre dewlel prenn?

16Ro, ha kemmer, ha didhan dha enev,

drefenn na yllir gwaytyas plesour yn ifarn.

17Oll kig a gothha avel dillasenn,

rag bos an ordenans dhiworth henses, ‘Ty a verow yn sur!’

18Kepar ha delyow glas war wydhenn dew

may koedh re anedha hag erell a skyll,

yndella yth yw henedhow kig ha goes;

an eyl a verow ha'y gila yw genys.

19Pub gweyth a boder ha ny vydh namoy,

ha den a'n gwrug a dremen ganso.

20Gwynnvys an gour a breder a-dro dhe furneth

ha neb a resen gans konvedhes,

21neb a breder a'y fordhow yn y golonn

hag a aswonn hy hevrinyow.

22Hol war hy lergh kepar ha helghyas

ha'y hontrewaytya war hy fordhow.

23Neb a vir dre hy fenestri

hag a woslow orth hy darasow;

24neb a gamp ogas dh'y chi,

ha takkya y ebil-tylda orth hy fosow;

25ev a dhrehav y dylda yn hy ogas,

hag a ost yn harber a'n gwella;

26ev a worr y fleghes yn-dann hy skovva,

hag a gamp yn-dann hy skorrow;

27ev a vydh goskeusys gensi a-dhiworth an toemmder,

ha triga yn hy glori.