1Neb a berth own a'n Arloedh a wra hemma,

ha neb a dhalghenn y'n lagha a gyv furneth.

2Hi a dheu dhe vetya orto kepar ha mamm,

ha kepar ha benyn bries yowynk, yndella hi a'n dynnergh.

3Hi a'n mag gans an bara a gonvedhes,

ha ri dhodho an dowr a furneth dhe eva.

4Ev a boes warnedhi ha ny goedh ev,

hag ev a greg warnedhi ha ny vydh ev shamys.

5Hi a'n ughelha a-ugh y gentrevogyon,

hag igeri y anow yn kres an kuntelles.

6Ev a gyv lowender ha kurun a heudhder,

ha degemmeres hanow heb diwedh.

7Ny wra an re dalsogh hy havoes,

ha ny wra peghadoryon hy gweles.

8Pell yw hi dhiworth goeth

ha nevra ny breder gowygyon yn hy hever.

9Nyns yw gormola gwiw war dhiwweus peghador,

drefenn nag o dannvenys dhiworth an Arloedh.

10Rag y telledh bos gormola leverys yn furneth,

ha'n Arloedh a wra dhodho seweni.

Rydhses Bodh Mab-den

11Na lever, ‘Drefenn an Arloedh yth yth vy yn sowdhan’;

rag ny wra ev an pyth a gas.

12Na lever, ‘Ev yw neb a'm ledyas yn sowdhan’,

rag nyns eus edhomm dhodho a beghador.

13An Arloedh a gas pub tra gasadow,

ha nyns yns kerys gans an re a berth own anodho.

14Yth yw ev neb a wrug den y'n dallethvos,

hag ev a'n gasas yn nerth y vodh y honan.

15Mar mynnydh, ty a yll gwitha an arghadowyow,

ha gul yn lel an pyth a vynnydh.

16Ev re worras a-dheragos tan ha dowr;

ystynn dha leuv dhe gavoes pyneyl a vynnydh.

17A-dherag den yw bewnans hag ankow,

ha pyneyl a dhewis ev a vydh res dhodho.

18Rag meur yw furneth an Arloedh;

galloesek yw ev yn nerth, hag ev a wel pup-tra;

19yma y lagasow war an re a berth own anodho,

hag ev a aswonn pub gweythres a dhen.

20Ny worhemmynnis dhe dhenvyth bos didhuw,

na ros kummyas dhe dhenvyth dhe begha.