Kessydhyans Peghadoryon

1Na hwans meur a fleghes dhiles,

na lowenhe yn mebyon dhidhuw.

2Mar kressyons, na lowenha ynna,

marnas own an Arloedh a vo ynna.

3Na drest yn treusvewnans dha fleghes,

ha na fydh yn aga niverow;

rag gwell yw onan es mil,

ha merwel anvap yw gwell es kavoes fleghes dhidhuw.

4Rag der unn den a gonvedhes sita a yll bos lenwys a dus,

mes hi a yll bos diboblys dre gordh a dus dhilagha.

5Ow lagas re welas lies tra a'n par na,

hag ow skovarn re glewas taklow moy poesek es an re ma.

6Yn kuntelles a beghadoryon y fydh tan enowys, hag yn kenedhel dhiwostydh sorr a dhew.

7Ny wrug dehwelyans rag an gewri goth, neb a rebellyas yn oll aga nerth.

8Ny sparyas kentrevogyon Lot

a gasas ev dre reson a'ga balghder.

9Ny gemmeres piteth a genedhel breusys dhe dhistruyans,

rag an re a veu distruys yn aga feghosow;

10na rag an hwegh kans mil droesek

a guntellas yn kaletter aga holonn.

11Mar ny ve saw unn den kales y gilbenn,

y fia marthys mar pessya ev heb kessydhyans.

Rag yma mersi ha sorr ganso;

galloesek yw ev dhe ava, mes ynwedh ev a dhinew sorr.

12Mar veur dell yw y versi, yndella ynwedh yth yw y geredh;

ev a vreus gour herwydh y wriansow.

13Ny dhiank peghador gans y breydh,

ha ny vydh lestys perthyans an den duwek.

14Ev a wra spas rag pub gwrians a versi;

ha peub a dhegemmer herwydh y wriansow.

15An Arloedh a galeshas Faro ma na'n aswonnis,

may fe y wriansow aswonnys yn-dann nev.16:15 Nyns eus gwersow 15 ha 16 yn brassa rann an dornskrifow

16Apert dhe wrians oll yw y dregeredh;

hag ev a wrug dibarth ynter y wolow ha'n tewlder gans plemmik.

17Na lever, ‘My a vydh kudhys dhiworth an Arloedh,

ha piw y'n ughelder a'm kovha?

Yn mysk kemmys tus, ny vydhav aswonnys,

rag pyth yw ow enev y'n gwrians efan?

18Otta, an nev ha'n nev a nevow, an islonk ha'n bys,

a gren orth y dhevedhyans.

19An menydhyow ha selyow an norvys

a gren ha krysya pan vir ev orta.

20Ny yll kolonn prederi a-dro dhe hemma.

Piw a yll konvedhes y fordhow?

21Kepar hag annawel na yll denvyth y weles,

yndella yth yw an brassa rann a'y wriansow yn-dann gel.

22Piw a dheriv y weythresow a ewnder?

Piw a's gorta? Rag yma'n kevambos pell dhe-ves.’

23Hemm yw an pyth a dyb den heb konvedhes;

gour talsogh ha foll a dyb yn foll.

Furneth Duw Gwelys y'n Kreasyon

24Goslow orthiv, ow mab, ha kyv godhvos,

hag attend ow geryow gans rach.

25My a brof dhis dyskans orth poes,

ha derivas godhvos yn kewar.

26Y'n dalleth16:26 Y'n dalleth: Ow siwya an Ebrow. Greka Y'n vreus. pan wrug an Arloedh y wriansow,

ha wosa aga gul ervira aga rannow,

27ev a dhesedhas y oberow yn aray bys vykken,

ha fastya aga elvennow rag oll an henedhow.

Nyns eus naneyl nown na skwithter dhedha

ha ny asons aga lavuryow.

28Ny herdhyons an eyl erbynn y gila,

ha nevra ny dhisobayons i y er.

29Wosa hemma an Arloedh a viras orth an norvys,

ha'y lenwel a'y daklow da.

30Ev a worheras y enep gans pub sort a groadur bew,

ha dhe'n dor i a dhehwel.