1An Arloedh a greatyas den dhiworth dor,

ha'y dreylya ynno arta.

2Ev a ros dhedha niver kott a dhydhyow, ha seson,

hag a ros dhedha maystri war bup-tra war an norvys.

3Ev a's gwiskas gans nerth kepar ha'y nerth y honan,

hag ev a's gwrug yn y imaj y honan.

4Ev a worras own anedha yn pub kig bew,

ha ri dhedha mestrynses war vestes hag ydhyn.

5I a dhegemmeras devnydh a bymp galloes an Arloedh,

hag ev a rannas dhedha an hweghves, an galloes dhe brederi;

ha'n seythves, yeth, an galloes dhe styrya oberyansow Duw.

6Ev a ros dhedha kusul, taves ha lagasow,

skovornow ha kolonn rag prederi.

7Ev a's lenwis a wodhvos ha konvedhes,

ha diskwedhes dhedha dader ha droktra.

8Ev a worras y lagas war aga holonnow

rag diskwedhes dhedha meuredh y weythresow.

9Ev a wrug dhedha bostya bys vykken yn y varthusyon,

rag derivas meuredh y oberow gans konvedhes.

10I a wormel y hanow sans,

ha deskrifa meuredh y oberow.

11Ev a ros godhvos dhedha,

ha lagha bewnans avel eretons.

12Ev a wrug gansa kevambos bys vykken,

ha diskwedhes dhedha y vreusow.

13Aga lagasow a welas y veuredh gloryus,

ha'ga skovornow a glewas glori y lev.

14Ev a leveris dhedha, ‘Bedhewgh war a bub anwiryonedh.’

Hag ev a ros gorhemmynn dhe bubonan anedha a-dro dh'y gentrevek.

15Yma aga fordhow a-dheragdho pup-prys,

ha ny vydhons kudhys dhiworth y dhewlagas.

16Aga fordhow a-dhia'ga yowynkneth a dreyl war-tu ha droktra;

ny yllons gul ragdha aga honan kolonnow a gig yn le kolonnow a garrek.

17Pan dhibarthas ev an kenedhlow dres oll an bys,

ev a settyas rewler dhe bub kenedhel,

mes Ysrael yw rann dhe'n Arloedh y honan.

18Ev a vagas y gynsa genys gans dyskybleth,

hag a ros dhodho golow y gerensa, heb hy gasa byth.

19Aga oberow oll yw mar gler dhodho avel an howl,

hag yma y dhewlagas pup-prys war aga fordhow.

20Nyns yw aga anewnderyow kudhys dhiworto,

hag yma oll aga feghosow a-dherag an Arloedh.

21An Arloedh yw grassyes hag ev a aswonn y wrians y honan;

ny wrug aga skonya na'ga gasa, mes aga sparya.

22Alusen gour yw kepar ha bysow sel ganso,

hag ev a with kuvder den avel bew an lagas.

23A-wosa ev a sev yn-bann hag attyli dhedha,

ha tyli dial war aga fennow.

24Mes dhe'n re a gemmer edrek ev a re fordh dhe dhehweles,

hag ev a gennerth an re may fyllis aga ferthyans.

Dehwelyans dhe Dhuw

25Omdreyl war-tu ha'n Arloedh ha gasa dha beghosow;

pys a-dheragdho ha lehe dha dreuspassow.

26Dehwel dhe'n Ughella ha treyl dhiworth anewnder,

rag ev a'th hembronk yn-mes a dewlder bys yn golow yeghes;

ha kas taklow kasadow yn nerthek;

27Piw a ganmel dhe'n Ughella yn ifarn,

yn le an dus vew a re gras?

28Dhiworth den marow, grasyans a hedh, dell ve dhiworth nebonan heb bosva;

neb yw bew ha yagh a wormel an Arloedh.

29Ass yw meur tregeredh an Arloedh,

ha'y evyans dhe'n re a dreyl dhodho!

30Nyns yw pup-tra possybyl dhe dus,

rag nyns yw mab-den divarow.

31Pyth yw splanna es an howl? Byttegyns y wolow a yll difygya.

Yndella kig ha goes a dhevis droktra.

32Ev a vir war luyow nev ughella;

mes doust ha lusu yw mab-den oll.