Meuredh Duw

1Ev neb a vew bys vynnari a greatyas pup-tra yn kemmyn;

2nyns eus arall prevys gwiryon marnas an Arloedh,

ha nyns eus arall marnas ev,

3neb a lew an bys gans palv y leuv,

ha pup-tra yw gostydh dh'y vodh;

rag ev yw myghtern pup-tra oll,

ha der y nerth ev a wra diberth ynter taklow sans hag ansans.

4Ny ros ev kummyas dhe dhenvyth dhe dherivas y weythresow;

ha piw a yll hwithra y oberow meur?

5Piw a yll musura nerth y alloes?

Ha piw a yll keworra dhe dherivas y dregeredhow?

6Ny yllir aga lehe na'ga kressya,

na ny yllir hwithra marthusyon an Arloedh.

7Den pan worfenn y ober, nyns usi ev marnas ow talleth,

ha pan hedh, ev a vydh penndegys.

8Pyth yw den, ha rag pyth yw ev dhe les?

Pyth yw y dhader, ha pyth yw y dhrog?

9Sommenn dydhyow den

yw kans blydhen dhe'n moyha.

10Kepar ha deverenn a dhowr dhiworth an mor ha greunenn a dewes,

yndella yth yw boghes vlydhynyow yn jydh a dermyn heb diwedh.

11Rakhenna an Arloedh a dhiskwa perthyans dhedha

hag ev a dhiver y dregeredh warnedha.

12Ev a vir orta, hag aswonn aga thenkys dhe vos drog;

rakhenna ev a wront gevyans dhedha yn palster.

13Truedh den yw rag y gentrevek,

mes truedh an Arloedh yw rag oll kig.

Ev a's keredh, ha'ga dyskybla, ha'ga dyski,

ha gul dhedha treylya dhe-dre, avel bugel y bara.

14Truedh a'n jeves rag an re a gemmer y dhyskybleth

hag a fisten dhe witha y vreusow.

Kuvder hag Alusenow

15Ow mab, na worr namm y'th oberow da,

ha na ro duwon gans dha eryow pan redh neppyth.

16A ny wra an gluth siwajya an toemmder?

Yndella, ger yw gwell es ro.

17Yn tevri, a nyns yw ger gwell es ro da?

Y kevir an dhew yn gour grassyes.

18Heb gras ha diskortes yw foll,

ha ro a dhen avius a wra dhe lagasow omwetha.

Omhwithrans

19Kyns es ty dhe gewsel, dysk,

ha kyns es ty dhe vos yn klav, gwith dha yeghes.

20Kyns breus, hwither dha honan,

hag yn termyn visitasyon ty a gyv gevyans.

21Kyns ty dhe vos yn klav, omuvelha,

ha pan esos war vin pegha, dhiskwedh edrega.

22Na as travyth dhe'th lesta a gewera ambos a-boynt,

ha na worta bys vernans rag delivrans dhiworto.

23Kyns ty dhe wul ambos ombareus;

ha na vydh kepar ha den a brev an Arloedh.

24Perth kov a'y sorr yn dydhyow dha dhiwedh,

hag a dermyn dial pan dreyl ev y fas dhe-ves.

25Yn termyn palster, kovha an termyn a nown;

y'n dydhyow a gevoeth porth kov a voghosogneth hag edhomm.

26Studhyow a janj yntra myttin ha nos,

ha pup-tra a dreyl yn skav a-dherag an Arloedh.

27Den fur a vydh prederus yn pup-tra oll,

hag yn dydhyow a beghosow ev a vydh war a gammweythres.

28Pub den poellek a aswonn furneth,

hag ev a re gormola dhe seul a's kaffo.

29An re yw skiansek yn lavarow,

i aga honan a dheu ha bos fur,

ha diveri henlavarow kewar.

Omrewl

30Na hol dha ewlow isel,

mes fronna dha hwansow.

31Mar kesydh dha enev dhe lowenhe gans hwansow isel,

henna a wra dhis bos skorn dha eskerens.

32Na lowenha yn bewnans a palster,

ma na vi yn edhomm der y gost.

33Na dheu ha bos beggyer ow kevewya gans arghans chevisys,

ha ty heb travyth yn dha yalgh;

rag ena ty a vydh avius a'th vewnans dha honan.18:33 rag ena ty a vydh avius a'th vewnans dha honan: O siwya an Vulgat. Nyns usi an geryow ma y'n Greka, Ebrow na Syriek.