1Oberwas medhow ny vydh rych;19:1 Oberwas medhow ny vydh rych: War-lergh an Ebrow Neb a wra hemma ny vydh rych.

neb a dhispres taklow byghan a fyll tamm ha tamm.

2Gwin ha benynes a led doethyon yn sowdhan,

ha'n den a goweth gans horys yw pur dhiswar.

3Poder ha pryves a'n erit,

ha'n enev diswar a vydh kibyes dhe-ves.

Erbynn Klapp Lows

4Neb a drest yn tus erell yw skav y golonn,

ha neb a begh a wra kamm erbynn y enev y honan.

5Neb a lowenha yn droktra a vydh dampnys,

6mes neb a gas klappya a'n jeves le a dhroktra.

7Bythkweth na dhaslever keskows,

ha ny gellydh travyth.

8Na dheriv hwedhel a-dro dhe gar nag eskar,

ha na'n diskudh, marnas y fia pegh ragos.

9Rag nebonan a'th klewas ha mires orthis,

ha pan dheu an termyn ev a'th kas.

10A glewsys klapp? Gas e dhe verwel genes.

Bydh hardh, ny wra ev gul dhis tardha!

11Den foll a vydh yn angoes gans kyhwedhel

kepar ha benyn ow tineythi flogh.

12Kepar ha seth yw stag yn mordhos den,

yndella yth yw klapp yn torr an foll.

13Govynn orth kar; martesen ny'n gwrug,

ha mara'n gwrug, martesen ny'n gwra arta.

14Govynn orth kentrevek; martesen ny'n leveris,

ha mara'n leveris, martesen ny'n lever arta.

15Govynn orth kar; rag yn fenowgh sklander yw;

na grys pub klapp a glewydh.

16Den a yll slynkya heb mynnas.

Piw yw na beghas bythkweth gans y daves?

17Govynn orth dha gentrevek kyns es ty dh'y wodros;

ha ro spas dhe lagha an Ughella,

heb diskwedhes dha sorr dha honan.

18Own an Arloedh yw dalleth degemmeryans,

ha furneth a dhendil y gerensa.

19Godhvos a worhemmynnow an Arloedh yw dyskas bewnans,

ha'n re a wra taklow plegadow dhodho

a dheber frut gwydhenn anvarwoleth.19:19 Nyns usi gwersow 18 ha 19 yn brassa rann an dornskrifow.

Gwir Furneth ha Fals Furneth

20Own an Arloedh yw furneth oll,

hag yn furneth oll yma keweras an lagha,

ha godhvos a'y ollgalloesekter.19:20 ha godhvos a'y ollgalloesekter: Nyns usi an geryow ma yn brassa rann an dornskrifow.

21Pan lever gwas dh'y vester, ‘Ny wrav an pyth yw plegadow dhis’,

hwath mara'n gwra a-wosa ev a serr an den a'n meth.19:21: Nyns usi an wers ma yn brassa rann an dornskrifow.

22Nyns yw godhvos a dhroktra furneth,

ha nyns eus doethter yn kusul peghadoryon.

23Yma felder, ha henn yw kasadow,

hag yma den diboell, ha dhodho fowt furneth.

24Gwell yw ev neb a berth own a Dhuw, ha dhodho fowt konvedhes,

es den pur dhoeth a gammdremen erbynn an lagha.

25Yma felder kewar mes kammhynsek,

hag yma den a gamm kuvder dhe gavoes breus.

26Yma losel a ombleg dhe'n dor yn galarwisk,

mes y golonn yw leun a doell.

27Ev a gudh y fas hag omwul na yll klewes;

ha pan na waytir, ev a wra dha vleynya.

28Ha mar ny yll ev pegha dre fowt nerth,

ev a wra droktra kettell vo chons.

29Der y semlans yth aswonnir gour,

ha dhe'n kynsa vu yth aswonnir den poellek.

30Dillas gour, ha'y vaner a hwerthin, ha'y vaner a gerdhes,

a dhiskwa pup-tra anodho.