Lender dhe Dhuw

1Ow flogh, mar teudh nes dhe servya an Arloedh,

pareus dha enev dhe vos temptys.

2Gwra dhe'th kolonn bos ewn, ha bos fyrv,

ha na vydh fysk yn termyn ahwer.

3Glen orto ha na gildenn,

may fi ynkressys yn diwedh dha vewnans.

4Degemmer pypynag a vo dres warnas,

ha godhav gans perthyans pan vi dres dhe uvelder.

5Rag owr yw prevys y'n tan,

ha tus plegadow y'n forn a uvelheans.

6Trest ynno, hag ev a'th weres,

gwra dhe'th fordhow bos ewn, ha trest ynno.

7Hwi neb a berth own a'n Arloedh, gortewgh y versi;

na dreylyewgh dhe denewen, ma na goetthowgh.

8Hwi neb a berth own a'n Arloedh, trestyewgh ynno,

ha ny fyll agas gober.

9Hwi neb a berth own a'n Arloedh, gwaytyewgh pythow da,

ha joy heb worfenn ha mersi.

10Preder a'n henedhow koth ha gwel:

piw eus neb a drestyas y'n Arloedh ha bos gorrys dhe vismer?

Po piw eus neb a dhuryas yn own anodho ha bos forsakys?

Po piw eus neb a elwis orto ha bos dispresys?

11Rag an Arloedh yw leun a druedh ha mersi,

ev a av peghosow ha selwel yn termyn trobel.

12Go-i, kolonnow ownek ha diwleuv ydhil,

ha'n peghador neb a gerdh yn diw fordh!

13Go-hi, an golonn wann, rag nyns eus trest dhedhi!

Rakhenna ny vydh hi goskeusys.

14Go-hwi, neb re gollas agas perthyans!

Pandr'a wrewgh pan wra an Arloedh agas kessydhya?

15An re a berth own a'n Arloedh, ny dhisobayons y eryow,

ha'n re a'n kar a syns y fordhow.

16An re a berth own a'n Arloedh a hwila gul y vodh,

ha'n re a'n kar a vydh lenwys a'n lagha.

17An re a berth own a'n Arloedh a dharbar aga holonnow,

hag i a omuvelha a-dheragdho.

18Gesewgh ni dhe goedha yn diwla an Arloedh,

a-der yn diwla tus;

rag kepar dell yw y veuredh,

yndella ynwedh yw y versi.