Taw ha Kows

1Yma reprev nag yw a-brys;

hag yma den a dew, mes doeth yw.

2Ass yw repreva gwell es fernewi;

ha neb a avow y fowt a vydh gwithys a goll.

3Ass yw da diskwedhes edrega pan os keredhys,

rag yndella ty a omwith rag peghes bodhek.20:3 Nyns usi an wers ma yn brassa rann dornskrifow an Septuagint, nag y'n Vulgat, mes yma y'n vershyon Latin Koth. Yn dornskrifow an Septuagint a'n gyv yma gorrys dhe dhiwedh gwers 8.

4Kepar dell yeun spadhesik war-lergh defola gwyrghes

yndella yth yw neb a assay gul breus dre nerth.

5Yma den a dew mes prevys yw fur,

ha kasadow yw den arall rag ev dhe gewsel re.

6Yma den a dew rag nyns eus gorthyp dhodho,

ha den arall a dew rag ev dhe wodhvos an prys gwiw dhe gewsel.

7Den fur yw tawesek bys y'n prys gwiw,

mes braggyer ha foll a dremen dres an termyn na.

8Piwpynag a dhevnytthyo re a eryow a vydh kesys,

ha piwpynag a gemmerro dhodho y honan an gwir dhe gewsel a vydh kesys.

Lavarow Kontrari an Eyl dh'y Gila

9Gour a yll kavoes prow yn droglamm,

ha happwayn a yll treylya dhe goll.

10Yma ro na re travyth dhe'n riyas,

hag yma ro a dhre attal dewblek.

11Yma kollow drefenn glori,

hag yma tus re dhrehevis aga fenn dhiworth studh uvel.

12Yma neb a yll prena meur a bris byghan,

mes ev a dal seythplek anodho.

13Den fur a wra dhodho y honan bos kerys da der y eryow,

mes skoellys yw kortesis fellyon.

14Ny vydh gwayn dhis dre ro dhiworth diboell,

rag ny vydh mar dalvosek dell dyb ev.

15Ev a re boghes hag arvreusi yn feur,

ev a iger y anow kepar ha herot;

ev a re kendon hedhyw hag a-vorow ev a'n daskelow.

Kesys gans peub yw den a'n par na.

16Foll a lever, ‘Nyns eus kar dhymm,

ha nyns eus gras a'm masoberow;

17an re a dheber ow bara a gews anhwek.’

Assa vydh lower an re a wra ges anodho, ha pygemmys prys!

Kows Anwiw

18Gwell yw slynkya war an leur es slynkya gans an taves;

yndella, yn skon y teu terroes an dhrogoberoryon.

19Den ongrassyes yw kepar ha hwedhel derivys yn treveth anwiw,

usi pup-prys yn ganow an re drog aga megyans.

20Lavar koth dhiworth ganow foll a vydh skonys,

drefenn na'n deriv yn treveth wiw.

21Yma den neb yw lettys rag pegha gans boghosogneth,

ha pan bowes ny wra y gowses y drobla.

22Yma den a yll kelli y vewnans dre veth,

po y gelli drefenn y semlans gokki.

23Yma den a wra ambos dh'y gar rag meth,

hag y dreylya yn eskar heb ken.

Gowleverel

24Gow yw hager namm war dhen;

prest yw ev war dhiwweus an re drog aga megyans.

25Gwell yw lader ages gowek usadow,

mes terroes yw rann aga dew.

26Gnas gowek a dhri bismer,

hag yma y veth ganso pup-prys.

27Neb a gews yn fur a wra avonsyans ragdho y honan,

ha den doeth a bles brasyon.

28Neb a wonedh y dir a ynkress y drevas,

ha piwpynag a blessyo brasyon a wra amendys rag y gammhynseth.

29Presens ha rohow a dhall dewlagas an re fur,

kepar ha fronn war y anow i a dreyl keredh dhe-ves.

30Furneth kudhys ha tresor mes a wel,

pana les eus dhe'n eyl po dh'y gila?

31Gwell yw an den a gudh y follneth

ages den neb a gudh y furneth.