An Den Diek

1Den diek yw haval dhe ven plos gans kawgh,

ha pubonan a hwiban orth y vismer.

2Den diek yw haval dhe bellenn a deyl;

neb a'n kemmer yn-bann a'n shak yn-mes a'y leuv.

Fleghes Legrys

3Mewl yw bos tas dhe vab andhyskyblys,

ha dineythyans myrgh yw koll.

4Myrgh dhoeth a dhre eretons dh'y gour,

mes myrgh dhiveth a dhre anken dh'y thas.

5Myrgh dont a dhisenor hy thas ha'y gour,

hag yw dispresys gansa aga dew.

6Keskows mes a-brys yw haval dhe venestrouthi yn termyn kynvann,

mes hwyppys ha dyskybleth yw furneth pup-prys.

7Mar pew fleghes yn onest ha kavoes pygans,

i a gel iselder aga dineythyans;

8mes fleghes yw howtyn ha chorlek, dre vismer ha fowt dyskybleth,

a namm bryntinses aga dineythyans.22:8 Nyns yw gwersow 7 hag 8 yn brassa rann an dornskrifow.

Furneth ha Follenep

9Piwpynag a dhysko foll yw haval dhe neb a lus war-barth darnow lestri,

po neb a dhifun koskador a'y hunes down.

10Piwpynag a lavarro hwedhel dhe foll a'n lever dhe dhen hunyek;

hag y'n diwedh ev a lever, ‘Pandra yw?’

11Oel rag an den marow, rag golow re fyllis dhodho;

hag oel rag an foll rag ev re eskasas y skians.

Oel le rag an den marow, rag yma ev ow powes;

mes bewnans an foll yw gweth ages mernans.

12Kynvann rag an den marow a bes seyth dydh,

mes rag foll ha den didhuw, y pes dydhyow oll y vewnans.

13Na ystynn dha gows gans foll

na visitya den talsogh.

Omwith dhiworto ma na' fo ahwer,

ma na vi defolys gans y follneth.

Diberth anodho ha ty a gyv powes,

ha ny vydhydh skwithhes gans y vuskogneth.

14Pyth yw poessa ages plomm?

Ha pyth yw y hanow marnas ‘Foll’?

15Tewes, hoelan, ha tamm a horn

yw esya dhe berthi ages den talsogh.

16Keber a brenn kelmys yn fyrv yn drehevyans

ny yll bos lewsys gans dorgrys;

yndellma kolonn ervirys fyrv wosa kusul dhoeth

ny's teves own yn barras.

17Kolonn fastys dre breder poellek

yw haval dhe blaster teg war fos leven.

18Kloesyow settys war dyller ughel

ny sev fast erbynn an gwyns;

yndellma kolonn ownek gans ervirans den foll

ny sev fast erbynn own pynag.

Kowethyans

19Neb a big an lagas a dhre dagrow,

ha neb a big an golonn a's gwra dhe dhiskudha hy omglewans.

20Neb a dewl men orth ydhyn a's chas dhe-ves,

ha neb a villik koweth a dhistru kowethyans.

21Mar tennydh kledha erbynn koweth,

na goedh yn desper, rag yma fordh dhe dhehweles.

22Mar igerydh dha anow erbynn dha goweth,

na vydh prederus, rag akord a yll bos restorys.

Mes milliga, balghder, diskudhans a gevrinyow, po goli traytus –

y'n kasys ma pub koweth a fi dhe'n fo.

23Dendil fydhyans dha gentrevek yn y voghosogneth,

may lowenhahi ganso yn y sewena.

Sev rybdho yn termyn ahwer

may kevrenni ganso yn y eretons.

24Ethenn ha mog an fornes a dheu kyns an tan;

yndella y teu arvedhennow kyns krow.

25Ny'm bydh meth a woskeusi koweth,

ha ny omgudhav a-dhiworto.

26Mes mar teu dregynn dhymm a'y wovis,

piwpynag a glywvo anodho a vydh war anodho.

Pysadow rag Gweres erbynn Pegha

27Unnweyth a pe goelyador settys war ow ganow,

ha sel a dhoethter war ow diwweus,

ma na goetthen dredha,

ha ma na'm distrua ow thaves!