1A Arloedh, Tas ha Mester ow bewnans,

na as vy dh'aga husul,

ha na as vy dhe goedha dredha!

2Piw a sett hwyppys war ow frederow,

ha dyskybleth furneth war ow brys,

ma na'm sparyons y'm peghosow gwrys dre wall,

na askusya ow23:2 ow: Amendys. Greka aga. feghow?

3Poken ow hammweythresow a yll liesplekhe,

ha'm peghosow ynkressya,

ha my a goedh a-rag ow erbynnoryon,

ha'm eskar a lowenha warnav.

4A Arloedh, Tas ha Duw ow bewnans,

na ro dhymm golok howtyn,

5ha kemmer a-dhiworthiv drokhwans.

6Na'm fethes naneyl kowlogneth na lust,

ha na ro vy dhe vrys diveth.

Dyskybleth an Ganow

7Goslowewgh, ow mebyon, orth dyskybleth an ganow;

ny vydh kechys neb a's gwith.

8Peghadoryon yw breusys der aga gweusyow;

dredha an milliger ha'n orgelus a drebuch.

9Na as dha anow dhe vos usys dhe liow;

na leverel yn usadow hanow an Sans;

10rag dell na vydh heb brewyon

an gwas neb yw prest yn-dann hwithrans,

yndellma neb a volleth prest yn hanow Duw

ny vydh glanhes a begh.

11Gour a de meur a diow yw leun a anewnder,

ha nyns a an skorja a-dhiworth y ji.

Mar kwra treuspass, y begh a worta ganso,

ha mar ny wra vri anodho, ev a begh yn tewblek;

mar te yn euver, ny vydh ewnhes,

rag y ji a vydh leun a droblow.

Taves Plos

12Yma fordh a gewsel haval dhe vernans;

na vedhes kevys yn eretons Yakob!

rag traow oll a'n par ma a vydh pell a'n re dhuwek,

ha ny gemmerons rann yn peghosow.

13Na as dha anow dhe vos usys dhe yeth arow plos,

rag ynni yma kows leun a begh.

14Porth kov a'th tas ha'th vamm

pan esedhydh yn mysk tus vras,

po ty a ankev dha honan yn aga golok,

hag omdhegi avel foll dre dha usadow;

ena ty a vynn na veus bythkweth genys,

ha ty a volleth dydh dha dhineythyans.

15Den yw usys dhe dhevnydhya geryow arvedhus

ny vydh nevra dyskyblys oll dydhyow y vewnans.

Erbynn Avoutri

16Dew eghenn a dus a ynkress peghosow,

ha'n tressa a dhre sorr.

Enev tesek a dhew avel tan

na vydh difeudhys bys pan vo konsumys;

den a wra fornikasyon gans y neskar

ny hedh bys pan y'n kowllesk an tan.

17Dhe dhe'n a wra fornikasyon pub bara yw hweg;

ny skwithha bys pan verow.

18Gour a begh erbynn gweli y briosoleth

a lever dhodho y honan, ‘Piw a'm gwel?

Yma tewlder a-dro dhymm, an fosow a'm kudh,

ha denvyth ny'm gwel. Pana edhomm eus dhymm a own?

An Ughella ny berth kov a beghosow.’

19Ny berth own marnas a dhewlagas tus,

ha ny gonvedh bos dewlagas an Arloedh

deg milweyth splanna es an howl;

i a wel oll fordhow tus,

ha gweles rannow kevrinek.

20Kyns bos pup-tra gwrys, aswonnys veu dhodho,

hag yndellma y feu wosa aga bos kowlwrys.

21An den ma a vydh kessydhys yn stretow an sita,

hag yn tyller ma na'n gwayt, ev a vydh dalghennys.

22Yndellma yth yw gans benyn a as hy gour

hag a re dhodho her dre wour arall.

23Rag yn kynsa, hi re dhisobayas lagha an Ughella;

nessa, hi re wrug treuspass erbynn hy gour;

ha tressa, dre hy anvaseth reydhel hi re wrug avoutri

ha dineythi fleghes dre wour arall.

24Hi hy honan a vydh dres a-rag an kuntelles,

hag y fydh kessydhyans war hy fleghes.

25Ny wra hy fleghes gwreydhya,

ha ny dheg hy skorr frut.

26Hi a as kov milliges

ha'y disenor ny vydh defendys dhe-ves.

27An re yw gesys a aswonn

nag eus travyth yw gwell es own an Arloedh,

na travyth hwekka es koela orth gorhemmynnow an Arloedh.

28Enor meur yw holya Duw,

ha bos degemmerys ganso yw bewnans hir.23:28: Nyns usi an wers ma yn brassa rann an dornskrifow.