Gormel Furneth24:1 Yma an titel ma y'n tekst greka y honan.

1Furneth a wormel hy honan,

ha kewsel a'y glori yn kres hy fobel.

2Yn kuntelles an Ughella hi a iger hy ganow

hag yn lok y luyow

hi a gews a'y glori:

3‘My a dheuth yn-mes dhiworth ganow an Ughella,

ha kudha an nor avel niwl.

4Trigys veuv y'n ughelderyow,

hag yma ow thron yn koloven a gommol.

5My ow honan a gylghyas an kylgh a nev

ha kerdhes dre dhownderyow an islonk.

6Yn donnow an mor hag yn oll an dor,

hag yn pub pobel ha pub kenedhel my re'm beu perghennogeth.

7Yn mysk oll an re ma my a hwilas powesva;

yn tiredh piw y trigav?

8‘Ena Kreador pup-tra a ros dhymm gorhemmynn,

ha'm Gwrier a dhewisas tyller ow thylda.

Yn-medh ev, “Bedhes dha drigva yn Yakob,

ha'th eretons yn Ysrael.”

9Y'n dallethvos, kyns bos an bys, ev a'm gwrug,

ha rag pub oes ny hedhav bos.

10Y'n tylda sans my a servyas a-ragdho,

hag yndellma my a veu fastys yn Sion.

11Keffrys y'n sita garadow ev a ros dhymm powesva,

hag yn Yerusalem yth esa ow mestrynses.

12My a wreydhyas yn pobel enorys,

yn rann an Arloedh, y eretons.

13‘My a devis ughel avel kederwydhenn yn Lebanon

hag avel kypresenn war venydhyow Hermon.

14My a devis ughel avel palmwydhenn yn En-gedi,

hag avel prysk ros yn Yeriko;

avel olewbrenn teg y'n mes,

ha tevi avel platanwydhenn ryb an dowr.

15Avel kinnamon hag aspalathus my a ros melyseth,

hag avel myrr a'n gwella my a lesas blas hweg,

avel galbanum hag onygha ha stakte

hag avel ethenn ynkys y'n tabernakel.

16Avel terebinthenn my a lesas ow skorr,

hag ow skorr yw skorr enor ha gras.

17Avel an gwinbrenn my a dheg yn-rag sawer hweg,

hag ow bleujennow yw frut enor ha palster.

18Yth ov an vamm a gerensa deg,

hag a own, hag a wodhvos hag a wovenek sans:

res ov, ytho, drefenn ow bos heb diwedh,

dhe'm fleghes oll yw henwys ragdho.24:18 Nyns usi an wers ma yn brassa rann an dornskrifow.

19‘Dewgh dhymm, hwi a'gas beus hwans ahanav,

ha bedhewgh lenwys a'm frut.

20Rag an kov ahanav yw melyssa ages mel,

hag ow eretons melyssa ages kribenn vel.

21An re a dheber ahanav a vydh nownek rag moy,

ha'n re a yv ahanav a's tevydh hwath syghes.

22Piwpynag a vo gostydh dhymm ny vydh gorrys dhe veth,

ha'n re a ober genev ny begh.’

Furneth ha'n Lagha

23Oll hemma yw lyver kevambos Duw Ughella,

an lagha a worhemmynnis Moyses dhyn

avel eretons rag kuntellesow Yakob.

24Na fyllewgh bos krev y'n Arloedh;

klyj dhodho ma'th krevha:

rag an Arloedh Ughella unnsel yw Duw,

hag a-der ev nyns eus Selwador arall.24:24 Nyns usi an wers ma yn brassa rann an dornskrifow.

25Fenna a wra, avel Pishon, gans furneth,

hag avel an Tigris yn termyn an kynsa frut.

26Ev a's lenow a gonvedhes avel an Ewfrates,

hag avel an Yordan yn dydhyow trevas.

27Ev a dhiver dyskans avel an Nil,

hag avel Gihon yn dydhyow trevas an gwin.

28Ny's aswonnis an kynsa den yn leun,

na ny's konvedhas an diwettha.

29Rag hy frederow yw ynkressys moy ages an mor,

ha'y husul downa es an islonk meur.

30Ha my, my o avel gover dhiworth avon,

avel kanel dowr ow mos yn lowarth.

31Yn-medhav, ‘My a dhowrha ow lowarth

ha gorlybya ow gweliow bleujyow.’

Hag otta, ow gover a dheuth ha bos avon,

hag ow avon a dheuth ha bos mor.

32My a wra dhe dhyskans splanna avel an bora,

ha my a'n diskwedh a-bell.

33My a dhiver arta dyskans avel profoesans,

ha'y asa dhe henedhow a dheu.

34Gwelewgh na lavuris ragov my ow honan

mes rag keniver a hwila furneth.