Gwynnvys an Gour a Wreg Dha

1Gwynnvys an gour a wreg dha;

niver y dhydhyow a vydh dewblekhes.

2Gwreg lel a lowenha hy gour,

hag ev a gollenow y vlydhynyow yn kres.

3Gwreg dha yw bennath veur;

hi a vydh grontys yn mysk bennathow an re a berth own a'n Arloedh.

4Po golusek po boghosek, y golonn yw lowen,

ha pup-prys y fas yw lowenek.

Tebelwreg

5Rag tri thra ow holonn a's teves own,

ha rag an peswora my a'm beus own meur;

sklander y'n sita, kuntelles routh,

ha fals kuhudhans – oll an re ma yw gweth ages mernans.

6Mes yma anken kolonn hag ahwer pan vo gwreg avius a wreg arall,

ha skorja hy thaves yw kemmyn dhe oll an peswar.

7Gwreg dhrog yw yew a rut;

hy synsi yw haval dhe dhalghenna skorpyon.

8Gwreg vedhow a dhre sorr meur;

ny yll hi kudha hy sham hy honan.

9Gwreg avoutrek a yll bos aswonnys

dre hy golok howtyn ha kroghen hy lagas.

10Gwith yn stroeth war vyrgh benn-kales,

rag own hi dhe wul drog dhevnydh a'th logheth.

11Omwith dhiworth hy lagasenn dont,

ha na gemmer marth mar kwra kamm er dha bynn.

12Dell iger tremenyas y anow ha dhodho syghes,

hag eva a dhowr pynag yn y ogas,

yndellma hi a esedh a-rag pub ebil-tylda

hag igeri hy goen dhe'n seth.

Bennath Gwreg Dha

13Gwreg rasek a bles hy gour,

ha'y sleyghneth a worr kig war y eskern.

14Gwreg dawesek yw ro an Arloedh,

ha nyns eus travyth mar dhrudh avel enev dyskyblys.

15Gwreg glor a geworr ras dhe ras,

ha ny yll mantolyow poesa bri hy omrewl.

16Avel an howl ow sevel yn ughelderyow an Arloedh,

yndellma yth yw tekter gwreg dha yn dyghtyans hy chi.

17Avel lugarn ow splanna war an kantolbrenn sans,

yndellma yth yw fas teg war gorf adhves.

18Avel kolovenyow owrek war selyow a arghans,

yndellma yth yw diwarr deg ha dewufern fyrv.

19Ow flogh, gwith yagh flour dha yowynkneth,

ha na ro dha wouroleth dhe estrenyon.26:19 Nyns eus gwersow 19 bys 27 yn brassa rann an dornskrifow.

20Hwila park feyth a-ji dhe'n plen oll,

ha'y hasa gans dha has dha honan, ow fydhya y'th devedhyans nobyl.

21Yndellma dha agh a sewen,

ha gans fydhyans yn aga devedhyans nobyl, i a dheu ha bos meur.

22Hora yw synsys avel trew,

ha benyn dhemmedhys yw marowji dh'y garoryon.

23Gwreg dhidhuw yw res avel rann dhe wour dilagha,

mes gwreg dhuwek yw res dhe wour a berth own a'n Arloedh.

24Benyn dhiveth a omdheg yn tivlas,

mes myrgh glor a vydh onest hwath a-rag hy gour.

25Gwreg benn-kales yw synsys avel gast,

mes neb a's teves omglewans a veth a berth own a'n Arloedh.

26Benyn a enor hy gour a vydh synsys dhe vos fur gans peub,

mes mara'n disenor yn hy balghder, hi a vydh aswonnys gans peub avel didhuw.

Lowen yw gour gwreg dha;

rag niver y vlydhynyow a vydh dewblekhes.

27Gwreg ughel hy lev ha tavosek yw avel hirgorn batel,

ha gour gans gwreg avel henna a spen y vewnans yn bresel.

Tri Thra Ankensi

28Yma dew dra a dhuwenha ow holonn,

ha'n tressa a'm gwra serrys;

gour rych26:28 gour rych: Amendys war-lergh an Syriek. Ebrow kasor. hag a dheuth ha bos boghosek,

gwer boellek yw dyghtys gans bismer,

ha den a gildenn a wiryonsys dhe begh –

an Arloedh a'n darbar dhe'n kledha.

29Skant ny yll marchont omwitha a dhrogober,

na nyns eus gwikor ankablus a begh.