1Lies re beghas rag budh,27:1 budh: War-lergh re a'n dornskrifow budh trufel.

ha neb a hwila bos rych a dreyl dhe-ves y lagas.

2Dell vydh ebil-tylda gorrys yn fyrv yn fols yntra meyn,

yndellma pegh yw gennys yntra gwertha ha prena.

3Mar nyns yw den fyrv yn own an Arloedh,

y ji a vydh domhwelys yn skon.

Provow yn Bewnans

4Pan vydh shakys an rider, an atal a drig;

yndellma y hwra mostedhes den yn y gows.

5An forn a brev lestri an priweythor;

yndellma yma prov den yn y resna.

6Hy frut a dhiskudh gonisogeth gwydhenn;

yndellma kows den a dhiskudh prederow y golonn.

7Na wormel gour kyns ev dhe gewsel,

rag y'n fordh ma tus yw prevys.

Gober ha Kessydhyans

8Mar holydh ewnder, ty a'n kyv

ha'y wiska avel goen gloryus.

9Ydhyn a neyth gans aga eghenn aga honan,

yndellma gwirder a dheu dhe dre dhe'n re a'n gweythres.

10Lew a gontrewayt preydh;

yndellma pegh a gontrewayt an dhrogoberoryon.

Kows Fur ha Foll

11Keskows den duwek yw pup-prys fur,

mes an foll a janj avel an loer.

12Yn mysk tus talsogh hwila chons dhe omdenna,

mes gorta termyn hir yn mysk tus prederus.

13Kows fellyon yw divlas,

ha'ga yma aga hwarth yn drokhwans peghus.

14Aga molleth ha millik a wra an gols dhe sevel serth,

ha'ga hedrynnow a wra dhe re erell stoppya aga skovarn.

15Strif an re woethus a led dhe skoellya goes,

Ha'ga milliga yw ankensi dhe'n skovarn.

Trayta Kevrinyow

16Neb a drayt kevrinyow a dhistru fydhyans,

ha ny gyv nevra koweth hegar.

17Kar dha goweth ha bydh lel dhodho;

mes mar traytydh y gevrinyow, na hol war y lergh.

18Rag dell dhistru den y eskar,

yndellna ty re dhistruis kowethyans dha gentrevek.

19Kepar dell as den edhen dhe dhiank yn-mes a'y leuv,

yndellma ty re asas dha gentrevek dhe vos ha ny'n kechydh arta.

20Na hol war y lergh, rag re bell yw gyllys,

ha dienkys avel ewik a'n antell.

21Rag goli a yll bos lystennys,

hag yma akord wosa arvedhenn,

mes neb re draytas kevrinyow yw heb govenek.

Fayntys ha Dial

22Neb a wynk gans an lagas a vras dregynn,

ha'n re a'n aswonn a ombellha dhiworto.

23Y'th wolok y anow yw oll hwekter,

hag ev a wra vri a'th heryow;

mes a-wosa ev a dreyl y gows

ha gans dha eryow dha honan ev a wra dhis trebuchya.

24My re gasas lies tra, mes den a'n par na dres pup-tra;

an Arloedh ynwedh a'n kas.

25Piwpynag a dowllo men ewn war-vann a'n tewl war y benn y honan,

ha boemm toellus a iger lies goli.

26Piwpynag a ballo pytt a goedh ynno,

ha piwpynag a settyo maglenn a vydh kechys ynni.

27Neb a wra drog, henna a rol arta warnodho,

ha ny wodhvydh a-ble teuth.

28Den orgelus a skorn hag arvedh tus erell,

mes dial avel lew a'n kontrewayt.

29An re a lowenha yn koedh an re wiryon a vydh kechys yn maglenn,

hag angoes a's kemmer kyns aga mernans.

Dial ha Sorr

30Dial ha sorr, an re ma ynwedh yw kasadow,

mes peghador a's kyv aga dew.