1Neb a dhiell a gyv dial an Arloedh,

hag ev a with akont stroeth a'ga feghosow.

2Gav dha gentrevek an kamm re wrug,

ha dha beghosow a vydh gevys pan bysydh.

3A wra den perthi sorr erbynn den arall,

ha gwaytyas yaghheans a'n Arloedh?

4Mar ny'n jeves nebonan mersi war dhen haval dhodho,

a yll ev pysi gevyans rag y beghosow y honan?

5Mar kwith kig denel konnar,

piw a wra dehwelyans rag y beghosow?

6Porth kov a dhiwedh dha vewnans, ha hepkorr eskarogeth;

porth kov a legras ha mernans, ha glen orth an gorhemmynnow.

7Porth kov a'n gorhemmynnow ha na borth atti erbynn dha gentrevek;

porth kov a gevambos an Ughella, ha na wra vri a dhiskians.

8Omwith rag strif, ha dha beghosow a vydh le;

rag an penn-bros a enow strif.

9Peghador a woderr kowethyans

ha hasa strif yn mysk an re hebask.

10Yn kemusur dhe'n keunys y lesk an tan,

hag yn kemusur dhe'n gorthter, yndellma strif a gress;

yn kemusur dhe nerth den y fydh y sorr,

hag yn kemusur dh'y gevoeth ev a gress y gonnar.

11Kedrynn fysk a enow tan,

ha strif fysk a skoell goes.

An Tebel Daves

12Mar hwythydh orth gwryghonenn, leski a wra;

mar trewydh warnedhi, y fydh difeudhys;

mes an dhew a dheu yn-mes a'th hanow.

13Millik an kyhwedhler ha'n den dewblek y daves,

rag ev a dhistru an kres a lies.

14Sklander re shakyas lies,

ha'ga skattra a genedhel dhe genedhel;

ev re dhistruis sitys krev,

ha domhwel chiow tus veur.

15Sklander re worras gwragedh lel a'ga threvow,

ha gul dhedha kelli frut aga lavur.

16Ny wra an den a woslow orth sklander kavoes powes,

na ny drig yn kres.

17Strekys hwypp a verk an kig,

mes strekys taves a vrew an eskern.

18Lies re goedhas gans min an kledha,

mes nyns yns i mar lies dell yw an re a goedhas drefenn an taves.

19Gwynnvys an den yw gwithys ragdho,

ha na wodhevis y sorr,

ha na borthas y yew,

ha na veu kelmys gans y gadonyow.

20Rag y yew yw yew a horn,

ha'y gadonyow yw kadonyow a vrest;

21y vernans yw tebel vernans,

hag ifarn yw gwell agesso.

22Ny'n jeves galloes war an re dhuwek;

ny vydhons leskys yn y flamm.

23An re a eske an Arloedh a goedh yn y alloes;

leski a wra yn aga mysk ha ny vydh difeudhys.

Dannvenys vydh er aga fynn avel lew;

avel lewpard ev a's terr dhe demmyn.

24Gwayt y keydh dha dir gans spedhas,

kolm dha arghans ha'th owr,

25poes dha eryow yn mantol,

gwra daras ha barrys rag dha anow.

26Gwayt na slynki gans dha daves

ma na goetthi a-rag neb a gontrewayt.