Prestennow hag Attal

1An re dregeredhus a re prestenn dh'aga hentrevogyon;

owth ystynn leuv heweres i a with an gorhemmynnow.

2Ro prestenn dhe'th kentrevek yn termyn y esow;

attal dhe'th kentrevek y'n ewn brys.

3Gwith dha ambos ha bydh onest ganso,

ha ty a gyv pup-prys an pyth a vydh edhomm dhis anodho.

4Lies a wel prestenn avel happwayn,

ha gul kedrynn dhe'n re a's gweres.

5Bys pan dhegemmeras prestenn ev a amm dhe leuv den,

hag iselhe y lev pan gews a bythow y gentrevek;

mes yn prys attal ev a hok,

hag attyli gans ambosow gwag,

ha krodhvolas a-dro dhe'n termyn.

6Mar kwra an kresysor gwaska, ny gyv ev skant an hanter,

hag ev a'n gwel avel happwayn.

Mar ny wask, ev re gollas y vona,

ha gul eskar anodho heb edhomm;

ev a'n attal gans mollothow ha keredhyow,

hag yn le golewder ev a'n attal gans disenor.

7Lies ytho, a nagh ri prestenn, a-der drefenn pithneth,

mes drefenn own a vos frowsys heb edhomm.

8Byttegyns, godhav den eus yn studh uvel,

ha na hok ow tiskwedhes tregeredh dhodho.

9Gweres den boghosek drefenn an gorhemmynn,

hag yn y edhomm na'n dannvon dhe-ves gwag.

10Gwell yw kelli dha arghans a-barth broder po koweth,

ha na'n gas dhe wosseni yn-dann ven dhe vos kellys.

11Gwith dha dresor war-lergh gorhemmynnow an Ughella,

hag y tre dhis budh moy ages owr.

12Dege alusen y'th tresorva,

ha hi a'th delirv a bub anfeusi;

13gwell ages skoes krev ha guw poes,

hi a ladh ragos erbynn an eskar.

Mewghya Kendonow

14Gour da yw goestel rag y gentrevek,

mes den neb re gollas sham a vydh falladow ragdho.

15Na ankov kuvder dha vewghyer,

rag ev re ros y vewnans ragos.

16Peghador a skoell pythow y vewghyer,

17ha neb a'n jeves brys heb gras a forsak y dhelivrer.

18Bos goestel re dhiswrug lies gour hag o sewen,

hag a's tewlis a-dro avel tonnow an mor;

y hworras galloesogyon yn divroedh,

hag i re wandras yn mysk kenedhlow estren.

19Pan wra peghador neb re gemmeras goestel

siwya gwayn, ev a goedh yn kenyow lagha.

20Gweres dha gentrevek gwella gylli,

mes gwayt na goetthi dha honan.

Tre ha Helder

21Edhommow bewnans yw dowr, bara ha dillas,

hag ynwedh chi dhe gudha dha noethedh.

22Gwell yw bewnans an den boghosek yn-dann goskes y do y honan,

ages gwledh vryntin yn chi den arall.

23Bydh lowen gans boghes po meur,

ha ny glewydh keredh rag bos gwester.

24Bewnans truan yw mos a ji dhe ji;

avel gwester ny dal dhis igeri dha anow;

25ty a vydh an ost ha provia diwes heb kavoes gras,

ha keffrys ty a glew geryow hwerow a'n par ma:

26‘Deus omma, estren, pareus an voes,

ha gas vy dhe dhybri a'n pyth a' fydh.’

27‘Ro spas, ty estren, dhe dhen enorys,

ow broder a dheu dhe driga hag edhomm a'm beus a'n chi.’

28Kales yw dhe dhen poellek perthi

tavosans a-dro dhe bos gwester, hag a-dro dhe keredh an okerer.