Dever Fleghes

1Goslowewgh orthiv, agas tas, A fleghes,

ha gul yndella, may fydhowgh gwithys yn sawder.

2Rag an Arloedh re enoras tas a-ugh fleghes,

hag ev re fastyas reyth an vamm a-ugh hy mebyon.

3Piwpynag a enorro y das a wra dehwelyans a beghosow,

4ha piwpynag a enorro y vamm

yw kepar hag onan a guntell tresor yn y withva.

5Piwpynag a enorro y das a'n jevydh joy yn y fleghes y honan,

ha pan bys ev, klewys vydh.

6Piwpynag a enorro y das a'n jevydh bewnans hir,

ha piwpynag a obayo an Arloedh a re powes dh'y vamm.

7Ev a serv y gerens avel mestrysi.

8Enor dha das gans ger ha gwrians,

may teffo warnas bennath dhiworto.

9Rag bennath tas a grevha gwreydh3:9 gwreydh: Ow siwya an Ebrow. Greka chiow. an fleghes,

mes molleth mamm a dhiwreydh an plans yowynk.3:9 an plans yowynk: Ow siwya an Ebrow. Greka fondyansow.

10Na ro glori dhis dha honan dre dhisenora dha das,

rag nyns yw disenor dhe'th tas enor dhiso jy.

11Rag y teu glori den der enora y das,

ha mewl yw mar ny wra fleghes enora aga mamm.

12A flogh, gweres dha das3:12 gweres dha das: Po war-lergh an tekst ebrow bydh fyrv owth enora dha das. yn y henys,

ha na wra grev dhodho der y vewnans oll;

13hwath mar fyll y vrys, diskwa perthyans;

na wra y dhispresya rag ty dhe vos yn oll dha nerth.

14Rag ny vydh ankevys kuvder dhe das,

hag erbynn dha beghosow hemma a vydh rag dha les;

15Yn dydh dha alar, hemma a vydh kovhes dhe'th favour;

kepar ha rew yn termyn kewer deg, dha beghosow a deudh dhe-ves.

16Piwpynag a forsakkyo y das yw kepar ha blasfemer,

ha piwpynag a sorro y vamm yw milligys gans an Arloedh.

Uvelder

17Ow mab, gwra dha oberennow yn klorder;

ena ty a vydh kerys gans tus yw plegadow dhe'n Arloedh.

18Dhe voy yth osta meur, dhe voy yth yw res ‎ dhis omuvelhe;

yndella ty a gyv gras a-dherag an Arloedh.

19Meur a dus yw ughel ha gerys-da:

mes diskudhys yw kevrinyow dhe'n re glor.

20Rag meur yw nerth an Arloedh;

gordhys yw ev gans an re uvel.

21Na hwila an pyth yw re gales ragos,

ha na hwither an pyth yw dres dha alloes.

22Preder a'n taklow re beu gorhemmynnys dhis,

rag nyns eus edhomm dhis a'n taklow yw kudhys.

23Na vell gans materyow yw dres dha alloes,

rag materow yw re veur rag konvedhes tus re beu diskwedhys dhis.

24Rag aga breus skav re hembronkas meur a dus mes a'n fordh,

ha tybyansow kamm re wrug dh'aga howsesyow slynkya.

25Heb dewlagas, yth osta heb golow;

heb godhvos nyns eus furneth.

26Kolonn worth a vydh plagys y'n diwedh,

ha piwpynag a garro peryll a verow dredho.

27Kolonn worth a vydh beghys gans troblys,

ha'n peghador a grug peghes war beghes.

28Nyns eus yaghheans dhe alar an den goethus,

rag bos plans a dhroktra gwreydhys ynno.

29Brys an den poellek a breder a barabolenn,

ha skovarn goslowyas yw hwans an den fur.

Alusen rag an Voghosogyon

30Dowr a dhifeudh tan ow flammya:

hag alusen a wra prenedh rag peghes.

31Piwpynag a attallo tornow da a breder a-dro dhe'n termyn a dheu,

ha pan goedh, ev a gyv skoedhyans.