Dyskybleth Fleghes

1Ev neb a gar y vab a'n hwypp yn fenowgh,

ma'n jeffo lowena y'n diwedh.

2Neb a gessydh y vab a'n jevydh lowena anodho,

ha bostya anodho yn mysk aswonnesigyon.

3Neb a dhysk y vab a wra dh'y eskerens bos avius,

ha lowenhe yn mysk y gowetha.

4Pan verow an tas ny hevel bos marow,

rag ev dhe asa war y lergh onan haval dhodho,

5neb orto yn y vewnans ev a viras gans lowena

hag yn eneworres ny veu grevys.

6Ev re asas war y lergh dialor erbynn y eskerens,

ha nebonan dhe attyli kuvder y gowetha.

7Piwpynag a dhyghtyo y vab yn re vedhel a gelm y woliow,

hag orth pub kri y golodhyon a vydh troblys.

8Margh nag yw dovys a dheu ha bos penn-kales,

ha mab digabester a vydh gorth.

9Bydh medhel gans flogh hag ev a'th vrowegh;

gwari ganso hag ev a'th keudh.

10Na hwarth ganso, po ty a' fydh ahwer ganso,

ha wortiwedh ty a dheskern dha dhyns.

11Na ro dhodho rydhses yn y yowynkneth,

ha na skon aswonn y gammweythresow.

12Pleg y warr yn y yowynkneth

ha gweskel y asennow pan yw flogh,

poken ev a dheu ha bos penn-kales ha bos diwostydh dhis,

hag yndellma dri ahwer dhe'th enev.

13Ytho dyskybel dha vab ha gwra dh'y yew bos poes,30:13 gwra dh'y yew bos poes: Ow siwya an Ebrow.

ma na vi sklandrys der y dhivethter.

14Gwell yw bos boghosek, yagh ha krev

ages rych ha plegys yn korf.

15Gwell yw yeghes ha krevder ages owr,

ha korf nerthek ages rychys diniver.

16Nyns eus golusogneth gwell ages yeghes korf,

na heudhder a-ugh lowena kolonn.

17Gwell yw mernans ages bewnans a anken,

ha powes bys vykken ages kleves bythkwethek.

A-dro dhe Boesow30:18 Yma an titel ma y'n tekst greka y honan.

18Traow dentethyel dinewys war anow deges

yw haval dhe offrynnow boes gorrys war vedh.

19Pana les yw offrynn dhe idol?

Rag ny yll na dybri na blasa.

Yndellma yth yw an den yw kessydhys gans an Arloedh;

20ev a wel gans y dhewlagas ha krodhvolas

dell hanas spadhesik pan vyrl ev gwyrghes.

21Na omro dhe dhuwon

ha na dorment dha honan a-borpos.

22Kolonn lowenek yw bewnans den,

ha heudhder gour yw dydhyow hir.

23Chersh dha enev ha konfort dha golonn,

ha dannvon duwon pell ahanas,

rag duwon re dhistruis lies,

ha nevra ny dheu les anodho.

24Avi ha sorr a verrha bewnans,

ha preder a dhre kothni kyns y dermyn.

25Den gans kolonn lowenek ha da

a's tevydh les a'n boes a dheber.